रौतहट। गौरस्थित यातायात व्यवस्था कार्यालयबाट एक जना बिचौलिया पक्राउ परेका छन्।

पक्राउ पर्नेमा गौर नगरपालिका-५ दोस्तिया टोलका ४० वर्षीय लक्ष्मीकुमार केशरी रहेका छन्। उनलाई गौर नगरपालिका-३ स्थित यातायात व्यवस्था कार्यालय परिसरबाट पक्राउ गरिएको जिल्ला प्रहरी कार्यालय रौतहटले जनाएको छ।

प्रहरीका अनुसार केशरीले सेवाग्राहीलाई विभिन्न काम छिटो गरिदिने भन्दै अनावश्यक झन्झट दिने, हैरानी गर्ने तथा सेवाग्राहीका कागजात बोकेर विभिन्न फाँटमा जाने गरेका थिए। साथै, कार्यालय परिसरमै सवारी चालक अनुमति पत्र (लाइसेन्स) बनाइदिने भन्दै प्रलोभन देखाउने गरेको पाइएपछि उनलाई पक्राउ गरिएको हो।

प्रहरी प्रवक्ता, प्रहरी नायब उपरीक्षक विष्णुप्रदिप बस्यालका अनुसार पक्राउ परेका केशरीमाथि थप अनुसन्धान अघि बढाइएको छ।