कपिलवस्तु। अवैध लागूऔषध चरेससहित तीन दिदीबहिनी र एक पुरुष गरी चार जना पक्राउ परेका छन्।

सीमावर्ती बजार कृष्णनगर बसपार्कबाट बागलुङ निसीखोला गाउँपालिका-६ की ३७ वर्षीया मनीषा घर्तीमगर, ३७ वर्षीया दिलकुमारी घर्तीमगर र रुकुमपूर्व भूमे गाउँपालिका-१ की ४० वर्षीया दिलकुमारी घर्तीमगरको साथबाट १४ केजी ४२७ ग्राम चरेस बरामद गरिएको जिल्ला प्रहरी कार्यालयका प्रवक्ता डीएसपी रिपेन्द्रकुमार सिंहले जानकारी दिए। यी तीनै जना एउटै आमाबुवाका छोरीसमेत भएको प्रहरीले पुष्टि गरेको छ।

तीन महिलासँगै रहेका बागलुङ निसीखोला-६ का ३४ वर्षीय नकुल घर्तीमगर पनि पक्राउ परेका छन्। उनको साथबाट कुनै सामग्री नसमातिए पनि घटनास्थलमा उनीहरूकै साथमा भएकाले पक्राउ गरिएको प्रहरीले जनाएको छ।

मंगलबार साँझ करिब ७ बजेतिर भारततर्फ जाँदै गर्दा कृष्णनगर बसपार्क नजिकै उनीहरू सीमाबाट करिब २०० मिटर दूरीमै पक्राउ परेका हुन्। गर्मी बढेकाले चरेसको गन्ध बाहिर आएको शंका लागेपछि प्रहरीको चेकजाँचमा ठूलो परिमाणमा चरेस फेला परेको हो। पक्राउ परेकाहरूलाई बुधबार अदालतबाट सात दिनको म्याद लिएर थप अनुसन्धान भइरहेको प्रहरीको भनाइ छ।