काठमाडौं । श्रम संस्कृति पार्टीका अध्यक्ष तथा प्रतिनिधिसभा सदस्य हर्क साम्पाङ आफ्नो फेसबुक पेज ‘हर्क साम्पाङ अ रिभोलुसन’ नियन्त्रणमा लिन सफल भएका छन् ।

उनको यो फेसबुक पेज केही दिनअघि ‘ह्याक्ड’ भएको थियो । उक्त पेज बिहीबार बिहानै नियन्त्रणमा लिन सफल भएपछि साम्पाङले प्रफुल्लित भएको झल्किने ‘इमोजी’ राखेका छन् ।

अर्को स्टाटसमा उनले ‘विरोधीहरूलाई हार्दिक धन्यवाद’ लेखेका छन् ।

१४ लाख फलोअर्स भएको साम्पाङको फेसबुक पेज त्रिभुवन अन्तर्राष्ट्रिय विमानस्थललाई यलम्बर अन्तर्राष्ट्रिय विमानस्थल लेखेको केही घण्टामै ह्याक्ड भएको थियो ।

आफ्नो लाखौँ फलोअर्स भएको फेसबुक पेजमा नियन्त्रण गुमाएपछि सोही नामको अर्को पेज खोलेर आफ्ना धारणा राख्दै आएका थिए ।

खासगरी बालेन्द्र शाह (बालेन) सरकारले आफ्ना १२ वटा राष्ट्रिय प्रतिबद्धतामा गणतन्त्र स्थापनापछि नामकरण गरिएको पूर्व–पश्चिम राजमार्गलाई महेन्द्र राजमार्ग भनेर पुनःस्थापित गरेपछि प्रतिक्रियामा साम्पाङले त्रिभुवन अन्तर्राष्ट्रिय विमानस्थललाई यलम्बर अन्तर्राष्ट्रिय विमानस्थल लेखेका थिए ।

कतिपयले उनको विरोध गरेका थिए । त्यहीबीच उनले आफ्नो फेसबुक पेजमा नियन्त्रण गुमाएका थिए ।