काठमाडौं । प्रधानमन्त्री बालेन्द्र शाह (बालेन)ले थापाथलीका सुकुम्बासी बस्ती शनिबार–आइतबारसम्ममा हटाउन सुरक्षा प्रमुखहरूलाई निर्देशन दिएका छन् ।

नेपाल प्रहरीका महानिरीक्षक दानबहादुर कार्की र सशस्त्र प्रहरी महानिरीक्षक राजु अर्याललाई बोलाएर जसरी भए पनि सुकुम्बासी बस्ती खाली गर्न बुधबार निर्देशन दिएको खुलेको हो ।

काठमाडौंका प्रमुख हुँदा पनि त्यहाँको सुकुम्बासी बस्ती खाली गर्न पटकपटक डोजर पठाएका थिए । महानगर प्रहरी र सुकुम्बासीहरूबीच धक्कामुक्का भएको थियो । सुकुम्बासीहरूले टायर बालेर बालेनको विरोध गरेका थिए ।

हाल प्रधानमन्त्री रहेका उनले बुधबार भने सुकुम्बासी बस्तीलाई हटाउन सुरक्षा प्रमुखहरूलाई निर्देशन दिएको खबरले हंगामा मच्चिएको छ ।

सुकुम्बासी बस्ती हटाउने उनको कदमका चौतर्फी आलोचना भएको छ । एमाले सचिव महेश बस्नेतदेखि जेन–जी अभियन्ता रक्षा बमलगायतले कडा शब्दमा बालेन सरकारप्रति प्रतिक्रिया जनाएका छन् । बालेन सरकारलाई ‘गरिबमारा’ भनेका छन् ।

जबकि, गत २१ फागुनमा भएको निर्वाचन अभियानका बेला भने बालेनले सुकुम्बासी बस्तीलाई बागमती नदीको बाढीले बगाउन सक्ने भन्दै जोगाउन खोजिएको रणनीतिक जवाफ दिएका थिए ।

उनका सभापति रवि लामिछानेले बालेन सरकार बन्दा सुकुम्बासी बस्तीमा डोजर नचल्ने र यदि चले आफू छाती थाप्न तयार हुने बताएका थिए ।

तर, सरकार गठन भएको एक महिना पनि नपुग्दै सुकुम्बासी बस्ती बल प्रयोग गरेर हटाउन बालेन कस्सिएका हुन् ।

मध्यमवर्गको समर्थन प्राप्त बालेन सरकारले गरिब, श्रमजीवी र मजदुरहरूमाथि अत्याचार गर्ने भन्दै तीब्र आलोचना भइरहेको छ ।