पोखरा । पोखराका विभिन्न स्थानमा बुधबार रातिदेखि प्रहरीको असाधारण सक्रियता देखियो। काहुँडाँडा, लम्भीडाँडा, रामबजार, लेखनाथ क्षेत्रका तालछेउ, लेकसाइड, महतगौंडा र दोबिल्लालगायत क्षेत्रमा रातभर सोधपुछ, पक्राउ र भ्यानमा हालेर लैजाने गतिविधि तीव्र रूपमा चल्यो। लगभग १० घन्टा चलेको यस घटनाले स्थानीयलाई सुरुमा अचम्मित बनायो।

पछि थाहा भयो-जिल्ला प्रहरी कार्यालय कास्कीले ‘स्वीप अपरेसन’ नामक विशेष अभियान सञ्चालन गरेको रहेछ। टोले गुण्डागर्दी, लागुऔषध ओसारपसार/प्रयोग, समाजमा अवाञ्छित गतिविधि र आतंक फैलाउने समूहलाई नियन्त्रणमा लिन प्रहरीले यस्तो अभियान चलाएको हो। एकै रातमा १२२ जनालाई पक्राउ गरिएको कास्की प्रहरी प्रमुख एसपी नवीन कार्कीले जानकारी दिए।

उनका अनुसार बुधबार राति ९ बजेदेखि बिहीबार बिहान ५ बजेसम्म करिब १०० जनाको प्रहरी टोली परिचालन गरिएको थियो। 

नयाँ वर्ष २०८३ सुरू भएदेखि कास्की प्रहरीले एकै रातमा यति ठूलो संख्यामा पक्राउ गरेको यो पहिलो मौका हो। यसअघि नयाँ वर्षको दिन २२ जना पक्राउ परेका थिए, जसमा १० जनाविरुद्ध मुद्दा दर्ता भएको थियो। ४ जनालाई मानव बेचबिखन र ६ जनालाई अभद्र व्यवहार सम्बन्धी कसुरमा मुद्दा चलाइएको प्रहरीले जनाएको छ।

प्रहरीका अनुसार समातिएका व्यक्तिहरूको पृष्ठभूमि र गतिविधिबारे थप अनुसन्धान जारी छ। पोखरामा लागुऔषध प्रयोगकर्ता तथा कारोबार बढ्दै जानु र ‘जेनजी’ आन्दोलनपछि गुण्डागर्दीसम्बन्धी गुनासो बढेपछि यस्तो व्यापक अपरेसन सञ्चालन गरिएको बताईएको छ।