काठमाडौं । पूर्वगृहमन्त्री सुदन गुरुङले बुधबार पदबाट राजीनामा दिए । उनले प्रधानमन्त्री बालेन्द्र शाहलाई भेटेर राजीनामा बुझाएका हुन् ।

गुरुङको राजीनामापछि उक्त रिक्त पदमा को आउँछ भन्ने विषयमा अहिले राजनीतिक वृत्तमा व्यापक चर्चा र चासो दुवै सुरु भएको छ ।

एकातिर गुरुङको पुनरागमन हुनेमा आशावादी पक्षले उनी क्लिन चिट लिएर पुनः फर्किनेमा ढुक्क रहेको दाबी गरिरहेका छन्। अर्कोतिर,  अरू नै गृहमन्त्री पदमा नियुक्त हुने तर्क पनि भइरहेको छ ।

सामाजिक सञ्जालमा विभिन्न सम्भावित नामहरूबारे अड्कलबाजी भइरहेका छन् । यद्यपि, प्रधानमन्त्री शाहले तत्काल नयाँ गृहमन्त्री नियुक्त नगर्ने तयारी रहेको स्रोतहरूको दाबी छ ।

गुरुङ निकट स्रोतहरूले भने उनी चाँडै पुनः गृह मन्त्रालयमा फर्किन सक्ने दाबी गरेका छन् । उनीहरूको भनाइअनुसार छानबिन समितिले केही दिनमै निष्कर्ष निकाल्नेछ ।

विवादित व्यवसायी दीपक भट्टसँग व्यापारिक साझेदारी रहेको खुलासापछि गृहमन्त्री गुरुङ दबाबमा परेका थिए । सोही पृष्ठभूमिमा उनले हिजो राजीनामा दिएका थिए ।

आरोपको छानबिन गर्न गुरुङले समिति गठनको माग गरेका थिए। तर प्रधानमन्त्री शाहले समितिभन्दा अगावै राजीनामा मागे।  समिति गठन भएर उनले सफाइ पाएको भए गृहमन्त्रीमा उनको पुनरागमन हुनसक्थ्यो । सामाजिक सञ्जालको चौतर्फी दबाब, प्रधानमन्त्री  र रास्वपा सभापति रवि लामिछानेको दबाबसँग उनको कुनै सिप चल्न सकेन ।

राजीनामा घोषणा गर्दै उनले आफूमाथि निष्पक्ष छानबिन गर्न चुनौतीसमेत दिएका छन् ।

गुरुङले प्रधानमन्त्री कार्यालयबाटै सामाजिक सञ्जाल फेसबुकमा स्टाटस लेख्दै राजीनामाको घोषणा गरेका थिए । त्यसपछि उनी गृह मन्त्रालय पुगेका थिए र करिब तीन घण्टा प्रधानमन्त्रीसँग बिताएका थिए ।

मन्त्रालयमा उनलाई औपचारिक बिदाइ गरिएको थियो । नेपाल प्रहरी र सशस्त्र प्रहरीका प्रमुखहरू पनि बिदाइका लागि मन्त्रालय पुगेका थिए । नेपाल प्रहरीका महानिरीक्षक दानबहादुर कार्कीले मायाको चिनो प्रदान गर्दै बिदाइ गर्दा गुरुङ भावुक पनि बने।

उनले हिजै सरकारी निवास छोडेर सितापाइलास्थित आफ्नो अपार्टमेन्टमा सरेको जनाइएको छ ।