काठमाडौं । नेपाली कांग्रेस संसदीय दलको नेता प्रतिनिधिसभा सदस्य भीष्मराज आङ्देम्बे बन्ने निश्चितजस्तै भएको छ । उनलाई दलको नेता बनाउने सभापति गगन थापा र उपसभापति विश्वप्रकाश शर्माको चाहना छ ।

आङ्देम्बे संसदीय राजनीतिका अनुभवी नेता हुन् । पार्टीका शीर्षमध्येका एक जना नेता उनी स्वच्छ छविका नेता मानिन्छन् । आङ्देम्बे दलको नेता हुन थापा–शर्माको पहिलो रोजाइमा छन् ।

पार्टीको विशेष महाधिवेशन पक्षधर र नियमित महाधिवेशन पक्षधर दुवै पक्षको साझा विन्दु नै आङ्देम्बे बन्ने देखिएको छ ।

गत वर्षको १९ चैतमा प्रतिनिधिसभा बैठकमा गरेको सम्बोधनले उनको राजनीतिक छवि थप उचो भयो । दलको नेतामा सांसदहरू अर्जुननरसिंह केसी, मोहन आचार्यलगायत केही दाबेदार छन् । तर, दुवैको सम्भावना नरहेको बताइन्छ ।