काठमाडौं।  अन्तरजातीय विवाह गरेका श्रीकृष्ण विकको सिन्धुलीको खुर्केटस्थित इलाका प्रहरी कार्यालयको हिरासतमा शंकास्पद मृत्युप्रकरणपछि सांसदहरू धर्नामा बसेका छन् ।

राष्ट्रिय स्वतन्त्र पार्टी (रास्वपा)का सांसद खगेन्द्र सुनार, रीमा विश्वकर्मा, सोही क्षेत्रका सांसद आशिष गजुरेल र नेपाली कम्युनिस्ट पार्टी (नेकपा)का सांसद गणेश विक जिल्ला प्रशासन कार्यालय अगाडि धर्नामा छन् । उनीहरू अनिश्चितकालीन धर्नामा बस्ने छन् ।

उनीहरूले बालेन सरकारसँग संसदीय छानबिन समिति गठनको माग गरेका छन् । तर, प्रधानमन्त्री बालेनले कुनै चासो दिएका छैनन् । सांसद खगेन्द्र सुनारले सिन्धुलीका प्रमुम जिल्ला अधिकारी, त्यहाँका प्रहरी उपरीक्षक र खुर्कोटका प्रहरी निरीक्षकलाई निलम्बनको माग गरेका छन् ।

सुनकोशी गाउँपालिका-३ का २२ वर्षीय श्रीकृष्ण विक ६ वैशाखमा खुर्कोट प्रहरीको हिरासतमा रहेको शौचालयमा झुण्डिएको अवस्थामा फेला परेको र उनको उपचारको क्रममा मृत्यु भएको प्रहरीले जनाएको थियो ।

उनले आत्महत्या गरेको प्रहरीले बताए पनि मृतककी आमा विन्दामाया विकले आफ्नो छोराको हत्या भएको बताएकी छन् । मृतकको शव बुझ्न पीडित परिवारले मानेको छैन ।

श्रीकृष्णले केही महिनाअघि खोटाङकी १८ वर्षीया निर्जला मगरसँग विवाह गरेर ललितपुरको सातदोबाटोमा बसेका थिए ।

सोधपुछका लागि सातदोबाटो प्रहरीले बोलाएको र जाँदा बालविवाह गरेको आरोपमा नियन्त्रणमा लिएर खुर्कोट पठाएको र श्रीकृष्णविरुद्ध बलात्कार मुद्दामा निर्जलाको परिवारले जाहेरी दिएका थिए ।

भनिन्छ, निर्जलाको नातामा काका पर्ने इलाका प्रहरी कार्यालयमै कार्यरत थिए । त्यसले गर्दा घटनालाई शंकास्पद मानिएको छ ।

यस्तोमा रास्वपा सांसद खगेन्द्र सुनार, रीमा विश्वकर्मालगायत चार सांसद बालेन सरकारसँग श्रीकृष्ण विकको मृत्युप्रकरणको छानबिन गर्न संसदीय समिति गठनको बाग गर्दै धर्नामा बसेका हुन् ।