सङ्खुवासभा । सङ्खुवासभाको मादी नगरपालिका-५ स्थित नेपाल राष्ट्रिय आधारभूत विद्यालय च्याङरीङका प्रधानाध्यापक डम्मरुप्रसाद दाहालमाथि कार्यकक्षमै हातपात भएको छ।

५४ वर्षीय दाहालमाथि भएको उक्त घटनामा संलग्न भएको आरोपमा सोही विद्यालयका शिक्षक सोमनाथ दाहाल (५५) र शिक्षिका लेखकुमारी भट्टराई (५४) लाई प्रहरीले पक्राउ गरेको जिल्ला प्रहरी कार्यालयका प्रहरी निरीक्षक मेघराज अर्यालले जानकारी दिए।

प्रहरीका अनुसार वैशाख ९ गते विद्यालय व्यवस्थापन समितिलाई पूर्णता दिने क्रममा शिक्षक प्रतिनिधि छनोटलाई लिएर प्रधानाध्यापक र शिक्षकबीच विवाद भएको थियो। सोही विवाद पछि बढ्दै जाँदा कार्यकक्षमै हातपातको घटना भएको हो।

घटनाका क्रममा निर्णयसम्बन्धी कागजातसमेत च्यातिएको बताइएको छ। प्रहरीले घटनाबारे थप अनुसन्धान भइरहेको जनाएको छ।