काठमाडौं ।  नेपाल स्टक एक्सचेञ्ज (नेप्से) परिसूचक आज २६.१६ अंकले घट्दै २,७७०.२६ बिन्दुमा पुगेको छ।

आज कुल ३४९ कम्पनीका १ करोड ४० लाख १३ हजार १६७ कित्ता सेयर १ लाख ५१ हजार २८६ पटक खरिदबिक्री भएका छन्। यस दिनको कुल कारोबार रकम रु ६ अर्ब ५२ करोड ८० लाख ७७ हजार ९७६ रहेको नेप्सेले जनाएको छ।

समूहगत सूचकमा अन्य समूह मात्रै ०.७३ प्रतिशतले बढेको छ भने बाँकी सबै समूहमा गिरावट आएको छ। बैंकिङ ०.८४, विकास बैंक १.२२, वित्त ०.६१, होटल तथा पर्यटन २.५६, जलविद्युत् १.७४, लगानी ०.४७ र जीवन बीमा समूह ०.१६ प्रतिशतले घटेका छन्।

त्यस्तै उत्पादन तथा प्रशोधन समूह २.४६, लघुवित्त ०.४४, म्युचुअल फन्ड ०.३१, निर्जीवन बीमा ०.३९ र व्यापार समूह ०.३९ प्रतिशतले ओरालो लागेको छ।

आजको कारोबारमा हिमालयन बैंक लिमिटेड बण्ड २०८६ को मूल्य सबैभन्दा धेरै ६ प्रतिशतले बढेको छ भने कर्पोरेट डेभलपमेन्ट बैंक लिमिटेडको सेयर मूल्य सबैभन्दा धेरै १४.९९ प्रतिशतले घटेको छ।