काठमाडौँ । इरानले नयाँ सर्वोच्च नेताका रूपमा मोज्तबा खामेनीको नाम घोषणा गरेको लामो समय भइसकेको छ। तर उनी अहिलेसम्म सार्वजनिक रूपमा देखिएका छैनन्। अमेरिकासँगको युद्धपछि एक–दुई पटक मात्र उनका लिखित वक्तव्य सार्वजनिक भएका थिए। त्यसयता उनको स्वास्थ्य अवस्था कमजोर रहेको भन्दै विभिन्न अन्तर्राष्ट्रिय सञ्चारमाध्यममा खबरहरू पनि आएका छन्।

यसैबीच, इरानका नयाँ सर्वोच्च नेता मोज्तबा खामेनीको अवस्थालाई लिएर विश्वभर चासो बढिरहेको छ।

यस सन्दर्भमा अमेरिकी विदेशमन्त्री मार्को रुबियोले इरानको नेतृत्वबारे टिप्पणी गर्दै शक्ति ‘कट्टरपन्थी सोच’ भएका व्यक्तिहरूको हातमा रहेको बताएका छन्। फक्स न्युजलाई दिएको अन्तर्वार्तामा उनले भने, ‘धार्मिक विचारधारामा आधारित कट्टरपन्थीहरू केवल इस्लामिक रिभोल्युसनरी गार्ड कोरका अधिकारीहरू मात्र होइनन्, उनीहरू इरानको राजनीति र वरपरका सल्लाहकार निकायहरूमा पनि सक्रिय छन्।’

सोही अन्तर्वार्तामा उनलाई इरानका सर्वोच्च नेता मोज्तबा खामेनीको अवस्थाबारे सोधिएको थियो। जवाफमा रुबियोले भने, ‘हामीसँग उनी जीवित रहेको संकेतहरू छन्, तर ठोस प्रमाण छैन। इरानले पनि उनी जीवित रहेको दाबी गर्दै आएको छ।’

पूर्व सर्वोच्च नेता आयतोल्लाह अली खामेनीपछि नेतृत्व सम्हालेका मोज्तबा खामेनी सार्वजनिक रूपमा देखिएका छैनन्। उनका कुनै भिडियो वा अडियो सार्वजनिक नभई हालसम्म केवल लिखित सन्देशहरू मात्र मिडियामा आएका छन्।