काठमाडौं । सरकारले सार्वजनिक यातायातको भाडा पुनः वृद्धि गरेको छ। यातायात व्यवस्था विभागले आज जारी गरेको सूचनामा यात्रुवाहक तथा मालवाहक सवारी साधनहरूको भाडा समायोजन गरिएको जानकारी दिएको छ।

विभागका अनुसार भौतिक पूर्वाधार तथा यातायात मन्त्रालयको १२ गते प्राप्त सैद्धान्तिक सहमतिअनुसार दुवै प्रकारका सवारी साधनमा ५ प्रतिशतले भाडा बढाइएको हो।

नयाँ दरसूचक सबैमा लागू हुने भए पनि विद्युतीय सवारी साधनमा भने भाडा वृद्धि नलागु हुने जनाएको छ। यसअघि चैत २५ गते पनि सार्वजनिक यातायातको भाडा समायोजन गरिएको थियो।