काठमाडौं । बुधबार सेयर बजारमा २५.८१ अंकको गिरावट आएको छ। यससँगै नेप्से परिसूचक २,७४४ अंकमा झरेको छ। अघिल्लो दिन पनि नेप्से २६.१६ अंकले घटेको थियो।

आज कारोबार रकम पनि घटेको देखिएको छ। अघिल्लो दिन ६ अर्ब ५३ करोड रुपैयाँको कारोबार भएकोमा आज घटेर ४ अर्ब ९८ करोड रुपैयाँमा सीमित भयो। बजारमा ३० कम्पनीको मूल्य बढ्दा २३५ कम्पनीको मूल्य घट्यो भने ४ कम्पनीको मूल्य स्थिर रह्यो।

सेक्टरतर्फ व्यापार समूह १.०९ प्रतिशत र विकास बैंक समूह ०.१४ प्रतिशतले बढे पनि अन्य अधिकांश समूह भने घटेका छन्। उत्पादन तथा प्रशोधन समूह सबैभन्दा धेरै २.२४ प्रतिशतले घट्यो। यस्तै बैंकिङ ०.७६, फाइनान्स ०.६४, होटल तथा पर्यटन १.६४, हाइड्रोपावर १.४५, लगानी ०.६६, जीवन बीमा ०.८४, माइक्रोफाइनान्स ०.५४, निर्जीवन बीमा १.११ र अन्य समूह ०.९२ प्रतिशतले घटेका छन्।

व्यक्तिगत कम्पनीतर्फ कर्पोरेट डेभलपमेन्ट बैंकको सेयर मूल्य सबैभन्दा धेरै १३.८१ प्रतिशतले बढ्यो। त्यसैगरी लक्ष्मी लघुवित्त २.६६, धौलागिरि लघुवित्त २.३३ र भुजुङ हाइड्रोपावर २.२६ प्रतिशतले बढे।

अर्कोतर्फ शिखर पावरको मूल्य सबैभन्दा धेरै ९.९२ प्रतिशतले घट्यो। पाल्पा सिमेन्ट इन्डस्ट्रिज ७.७९, त्रिशूली जलविद्युत ६.९८ र झापा इनर्जी ५.८३ प्रतिशतले घटेका कम्पनीमा परे।

आज सबैभन्दा धेरै कारोबार हुने कम्पनीहरूमा रिलायन्स स्पिनिङ मिल्स, पाल्पा सिमेन्ट इन्डस्ट्रिज, कर्पोरेट डेभलपमेन्ट बैंक, सोलु हाइड्रोपावर र नेसनल हाइड्रोपावर रहेका छन्।