काठमाडौं। प्रधानमन्त्री वालेन्द्र शाह (बालेन) ले बुद्ध जयन्तीका अवसरमा दिएको अभिव्यक्तिप्रति प्रतिक्रिया जनाउँदै जेनजी अभियन्ता रक्षा बमले साँचो क्रान्ति करुणाबाट सुरु हुने बताएकी छन्।

प्रधानमन्त्री शाहले शान्तिको सन्देश दिँदै साँचो क्रान्ति ‘क’ बाट नभई ‘ज्ञ’ बाट सुरु हुने र त्यो ‘ज्ञ’ ज्ञान भएको उल्लेख गरेका थिए। उक्त भनाइलाई उद्धृत गर्दै अभियन्ता बमले सामाजिक सञ्जालमार्फत प्रतिक्रिया दिँदै लेखेकी छन्, ‘साँचो क्रान्ति ‘क’ बाटै सुरु हुन्छ प्रधानमन्त्रीज्यू, र त्यो ‘क’ करुणा हो।’

सरकारले काठमाडौंका खोला किनारका सुकुम्बासी बस्तीमा डोजर चलाएर बस्ती हटाउने र प्रभावितहरूलाई होल्डिङ सेन्टरमा राखिएको विषयमा आलोचना भइरहेका बेला बमको टिप्पणी आएको हो।

दीर्घकालीन व्यवस्थापनको स्पष्ट योजना बिना नै बस्ती हटाइएको भन्दै नागरिक स्तरबाट विरोध भइरहेको छ। आलोचकहरूले सरकारको कदममा मानवीयता र करुणाको अभाव देखिएको आरोप लगाइरहेका छन्।

सुकुम्बासी बस्ती व्यवस्थापनको विषयलाई लिएर पछिल्ला दिनहरूमा बहस तीव्र बनेको छ भने नागरिक समाज र युवा अभियन्ताहरूले वैकल्पिक आवासको ग्यारेन्टीसहित मात्र यस्तो कार्य अघि बढाउन सरकारलाई दबाब दिँदै आएका छन्।