काठमाडौं । डोजरले आफ्नो टहरा भत्काएको हेर्न सकिँदैन भनेर आज बिहानै हिँडेका इन्द्रबहादुर राई मृत फेला परेका छन् । राई बल्खु नजिकैको बागमती खोलामा आज दिउँसो मृत फेला परेका हुन् ।

प्रहरीले घटनाबारे अनुसन्धान गरिरहेको जनाएको छ । प्रधानमन्त्री बालेनको निर्देशनमा आज बिहानै बल्खु क्षेत्रको सुकुम्बासी बस्तीमा चार वटा डोजरसँगै प्रहरी परिचालन भएका थिए ।

लगत्तै श्रीमती सरिता राईलाई ‘डोजरले आफ्नो टहरा भत्काएको हेर्न सकिँदैन’ भन्दै उनी टहराबाट बाहिर निस्किएका थिए, अन्दाज ६० वर्षीया राई दिउँसो भने मृत फेला परेका हुन् ।

परिवारका अनुसार टहरा भत्काएपछि कहाँ ओताउने ? वर्षौँ पसिना बगाएर बनाएको टहरा भत्काउने भयो भनेर उनी चिन्तामा थिए । अन्ततः उनी बागमती खोलामा मृत फेला परे । पारिवारीक स्रोतका अनुसारले उनले आत्महत्या गरेका हुन् ।

यसअघि काठमाडौंको मनोहरा सुकुम्बासी बस्तीमा डोजर चल्दा रविन तामाङका १७ वर्षे छोराले आत्महत्या गरेका थिए । रविनका अनुसार छोरा बालेन सरकारले टहरा भत्काएपछि के गर्ने होला भनेर गम्भीर चिन्तामा थिए । यस्तोमा उनी झुण्डिएको अवस्थामा मृत फेला परे ।

सुकुम्बासी बस्तीमा बालेन सरकारले डोजर चलाउँदा छोरा गुमाएका रविनको श्रीमती दमको रोगी छिन् । आमा पक्षघातले थलिएका छन् । रविनको पनि स्वास्थ्य अवस्था कमजोर छ ।

यस्तोमा रविनको छोराले आत्महत्या गरेको पाँच दिन नबित्दै बल्खुको सुकुम्बासी बस्तीमा बसेका इन्द्रबहादुर राईले पनि आत्महत्या गरेका हुन् ।