एजेन्सी। दक्षिणी लेबनानमा इजरायली आक्रमणका कारण १३ जनाको मृत्यु भएको लेबनानको स्वास्थ्य मन्त्रालयले पुष्टि गरेको छ। युद्धविराम कायम रहेको दाबी भइरहेका बीच पनि इजरायली सेनाले विभिन्न स्थानमा निकासी आदेश जारी गरेसँगै आक्रमण तीव्र बनाएको बताइएको छ।

हबबुस क्षेत्रमा भएको आक्रमणमा एक बच्चा र दुई महिलासहित ८ जनाको मृत्यु भएको र २१ जना घाइते भएको मन्त्रालयले जानकारी दिएको छ।

त्यसैगरी जररियामा भएको अर्को हवाई आक्रमणमा दुई महिलासहित ४ जनाको मृत्यु भएको र ४ जना घाइते परेको छ।

यस्तै, तटीय सहर टायर नजिकै भएको आक्रमणमा १ जनाको मृत्यु र ७ जना घाइते भएको उल्लेख गरिएको छ।

मन्त्रालयका अनुसार हबबुस क्षेत्रका बासिन्दालाई पहिले नै निकासी चेतावनी दिइएको थियो। लेबनानी राष्ट्रिय समाचार एजेन्सी (एनएनए) ले भने इजरायली लडाकु विमानहरूले चेतावनी जारी भएको एक घण्टाभन्दा कम समयमा नै आक्रमण सुरु गरेको जनाएको छ।

इजरायली सेनाले इरान समर्थित हेजबोल्लाहद्वारा युद्धविराम उल्लङ्घन भएको आरोप लगाउँदै समूहविरुद्ध बलपूर्वक कारबाही गर्ने चेतावनी दिएको थियो। सेनाले स्थानीय बासिन्दालाई सहरबाट कम्तिमा एक किलोमिटर टाढा खुला क्षेत्रमा सारिन समेत आग्रह गरेको थियो। एनएनएका रिपोर्टअनुसार टायरसहित दक्षिणी लेबनानका विभिन्न ठाउँमा तोप र गोली प्रहार पनि गरिएको छ।

अप्रिल १७ मा भएको युद्धविराम सम्झौतापछि पनि इजरायलले दक्षिणी लेबनानमा घातक हवाई आक्रमणहरू जारी राखेको आरोप लगाइएको छ। युद्धविरामले आफूलाई “योजनाबद्ध आक्रमणहरू विरुद्ध कार्य गर्ने अधिकार” दिएको इजरायली पक्षले दाबी गरेको एनएनएले जनाएकाे छ।

इजरायली सेनाले दक्षिणी सहर शामामा विस्फोट गराई यारुन सहरका मठ, मन्दिर र विद्यालय समेत ध्वस्त पारेको एनएनएले जानकारी दिएको छ।

यसबीच, अन्तर्राष्ट्रिय रेड क्रस र रेड क्रिसेन्ट सोसाइटी महासङ्घका राष्ट्रिय समाज विकास तथा समन्वयका उपमहासचिव जेभियर क्यास्टेलानोसले लेबनानी रेड क्रसका स्वयंसेवकहरू मिशनका क्रममा आफ्नो जीवन जोखिममा राखेर काम गर्न बाध्य भएको बताएका छन्।