भद्रपुर।  मेची भन्सार कार्यालयले चालु आर्थिक वर्ष २०८२/८३ को चैत मसान्तसम्म कुल रु १३ अर्ब १४ करोड ४५ लाख ८१ हजार राजस्व संकलन गरेको छ। जुन वार्षिक लक्ष्यको ६९.८३ प्रतिशत बराबर हो। 

कार्यालयका सूचना अधिकारी ईश्वरकुमार हुमागाईंका अनुसार यस वर्ष रु १८ अर्ब ८७ करोड ७४ लाख ८३ हजार राजस्व संकलन गर्ने लक्ष्य राखिएको छ। 

चैत महिनामा मात्रै रु १ अर्ब ६० करोड ६८ लाख ४७ हजार राजस्व उठेको छ।  जुन महिनावार लक्ष्यको ९४.६९ प्रतिशत हो। 

कार्यालयको तथ्यांक अनुसार साउनदेखि फागुनसम्म राजस्व संकलन क्रमशः साउनमा रु १ अर्ब २६ करोड ५० लाख ७९ हजार, भदौमा रु १ अर्ब ३६ करोड ४४ लाख ३९ हजार, असोजमा रु १ अर्ब ५२ करोड २४ लाख ९१ हजार, कात्तिकमा रु १ अर्ब ३० करोड ८१ लाख ८९ हजार, मंसिरमा रु १ अर्ब ३६ करोड ७४ हजार, पुसमा रु १ अर्ब ५८ करोड ८९ लाख २४ हजार, माघमा रु १ अर्ब ४७ करोड ८८ लाख ५७ हजार र फागुनमा रु १ अर्ब ६५ करोड ८० लाख ४ हजार रहेको छ। 

कार्यालयका अनुसार राजस्व संकलन गत वर्षको तुलनामा स्थिर रूपमा वृद्धि हुँदै गएको देखिएको छ।