काठमाडौं । इरान इजरायल तनावका कारण साउदी अरबमा मदिरा आपूर्तिमा असर परेको छ। युद्धका कारण ढुवानीमा ढिलाइ हुँदा बजारमा मदिराको उपलब्धता घटेको मदिरा पारखीहरूले समाचार संस्था रोयटर्सलाई बताएका छन्।

बीबीसीका अनुसार साउदी अरबमा एक मात्र सरकारी मदिरा पसल सञ्चालनमा छ, जुन राजधानी रियादको कूटनीतिक आवास क्षेत्रभित्र अवस्थित छ। हाल उक्त पसलमा पुग्ने ग्राहकहरूले महँगो मूल्य र सीमित ब्रान्ड मात्रै उपलब्ध भएको गुनासो गरेका छन्।

पसलमा कुनै नाम वा बोर्ड नराखिएको र यसलाई गोप्य रूपमा सञ्चालन गरिएको बताइन्छ। सन् २०२४ मा यो पसल सुरुमा गैर मुस्लिम कूटनीतिज्ञहरूलाई लक्षित गरेर खोलिएको थियो भने गत वर्षदेखि गैर मुस्लिम विदेशी नागरिकहरूका लागि पनि सेवा विस्तार गरिएको छ।

साउदी अरबमा सन् १९५२ देखि मदिरा पूर्ण रूपमा प्रतिबन्धित छ। तर, विदेशी कूटनीतिज्ञ तथा केही निश्चित वर्गका विदेशी कामदारलाई ध्यानमा राख्दै सीमित रूपमा लाइसेन्समार्फत बिक्री गर्न अनुमति दिइएको छ।