‘फाउन्डेसन फर डिफेन्स अफ डेमोक्रेसी’ का विज्ञ बेहनाम तालेबलुको भनाइ उद्धृत गर्दै विभिन्न रिपोर्टहरूमा इरानको वर्तमान शासन गम्भीर दबाब र डरको अवस्थामा रहेको दाबी गरिएको छ। उनका अनुसार, ठूलो सार्वजनिक कार्यक्रम आयोजना गर्दा सुरक्षा जोखिम अत्यधिक हुने भएकाले इरानी नेतृत्व संवेदनशील बनेको देखिन्छ।

रिपोर्टहरूमा उल्लेख भएअनुसार, खामेनीको मृत्युपछि क्षेत्रीय तनाव अझ बढेको र इजरायलले केही समयसम्म इरानका विभिन्न भागमा हवाई आक्रमण जारी राखेको दाबी गरिएको छ। यस्ता परिस्थितिका कारण अन्त्येष्टिमा ठूलो भीड भेला हुँदा सुरक्षा जोखिम बढ्न सक्ने आशंका इरानी अधिकारीहरूमा रहेको बताइन्छ।

विश्लेषकहरूको भनाइमा, अन्त्येष्टिको समयमा ठूलो जनसमूह जम्मा हुँदा बाह्य आक्रमण वा आन्तरिक विरोध प्रदर्शन हुन सक्ने सम्भावनाले सरकार थप सतर्क बनेको छ। यही कारणले औपचारिक अन्त्येष्टि कार्यक्रम ढिलाइ भइरहेको अनुमान गरिएको छ।

त्यसैगरी, नयाँ सर्वोच्च नेता मोज्तबा खामेनीको सार्वजनिक उपस्थिति नदेखिनु पनि चर्चाको विषय बनेको छ। विभिन्न रिपोर्टहरूमा उनी हालसम्म सार्वजनिक रूपमा नदेखिएको र संवेदनशील परिस्थितिका कारण औपचारिक रूपमा अगाडि नआएको दाबी गरिएको छ। केही दाबीहरूमा उनी हालैको आक्रमणमा घाइते भएको समेत उल्लेख भए पनि यसको स्वतन्त्र पुष्टि भएको छैन।

अन्त्येष्टि राजधानी तेहरान मा नगरी उत्तर-पूर्वी सहर मशाद मा सार्ने तयारी भइरहेको चर्चा पनि छ। मशाद खामेनीको जन्मस्थल भएको र भौगोलिक रूपमा तुलनात्मक रूपमा सुरक्षित मानिने भएकाले यसलाई सम्भावित विकल्पका रूपमा हेरिएको बताइन्छ।