काठमाडौं । जन्मथलो पाँचथरको नवमीडाँडा पुग्दा प्रमुख विपक्षी नेपाली कांग्रेस संसदीय दलका नेता भीष्मराज आङ्देम्बेलाई नौमती बाजागाजा बगाउँदै नेता कार्यकर्ताहरूले स्वागत गरेका छन् ।

गलामा माला र खादा लगाएर नेता आङ्देम्बेलाई उनीहरूले बधाई तथा शुभकामना पनि दिएका थिए । कांग्रेस संसदीय दलको नेता निर्वाचित भएपछि आङ्देम्बे पहिलोपटक पाँचथर पुगेका हुन् ।

आइतबार नेता कार्यकर्ताले स्वागत गरेपछि उनले भने, ‘केही दिनअघि नै आउँ लागेको थियो तर विविध कारणले ढिला भयो ।’

नेता आङ्देम्बेलाई स्वागत गर्न जिल्ला सभापति रुपनारायण जबेगू, कोशी प्रदेश सांसद मैया श्रेष्ठ लावती, तुम्बेवा गाउँपालिका अध्यक्ष बाबुराम खड्का, नेताहरू केदार बास्कोटा, बिमला हाङ्सरुम्बालगायत जिल्लास्थित नेता कार्यकर्ताहरू सहभागी थिए ।