एजेन्सी। भारतका प्रसिद्ध कमेडियन कपिल शर्मा फेरि एक पटक चर्चामा आएका छन्। क्यानडाको सरेमा रहेको उनको ‘क्याप्स क्याफे’ नजिकै एउटा रेस्टुरेन्टमा गोलीबारीको घटना भएको छ, जसले उक्त क्षेत्रमा हल्लाखल्ला मच्चाएको छ।

सोशल मिडियामा भाइरल भइरहेका दाबीअनुसार, यस आक्रमणको पछाडि लरेन्स बिश्नोई ग्याङको हात रहेको बताइएको छ। केही पोस्टहरूमा कपिल शर्मालाई सीधै ज्यान मार्ने धम्की पनि दिइएको दाबी गरिएको छ। यद्यपि यी दाबीहरूको आधिकारिक पुष्टि अहिलेसम्म भएको छैन।

सोशल मिडियामा ‘टाइसन बिश्नोई जोरा सिद्धू’ नामको फेसबुक अकाउन्टबाट गरिएको पोस्ट तीव्र रूपमा भाइरल भइरहेको छ। उक्त पोस्टमा सरेस्थित चाइ सट्टा बारमा गोलीबारी भएको दाबी गरिएको छ। जुन कप्स क्याफे नजिकै पर्छ।

पोस्टमा कपिल शर्मा र क्याफे मालिकलाई चेतावनी दिँदै भनिएको छ कि उनीहरूले ‘समय खेर नफालून्’ र तिनका सर्तहरू स्वीकार गरून्। साथै यदि त्यसो नगरे क्याफे र मुम्बईस्थित उनको घरलाई पनि निशाना बनाइने संकेत गरिएको छ।

२०२५ देखि आक्रमणको सिलसिला जारी

यो पहिलो पटक होइन जब कपिल शर्माको क्याफेलाई निशाना बनाइएको हो। सन् २०२५ देखि यस्ता घटनाहरूको सिलसिला जारी रहेको छ।

• १० जुलाई २०२५: क्याफे उद्घाटनको केही दिनपछि पहिलो पटक गोलीबारी
  ७ अगस्ट २०२५: एक महिनाभित्र दोस्रो आक्रमण
  १५–१६ अक्टोबर २०२५: तेस्रो पटक क्याफेमा गोलीबारी

तेस्रो आक्रमणपछि बिश्नोई नेटवर्कसँग जोडिएका व्यक्तिहरूले सामाजिक सञ्जालमा यसको जिम्मेवारी लिएको बताइएको छ।

सलमान खानसँग सम्बन्ध कारण?

ग्याङसँग सम्बन्धित दाबीअनुसार, कपिल शर्मालाई निशाना बनाउनुको कारण उनको सलमान खानसँगको सम्बन्ध हो भनिएको छ।

बताइन्छ कि ‘द ग्रेट इन्डियन कपिल शो’ को सुरुवातमा सलमान खानलाई बोलाएपछि यो असन्तुष्टि बढेको हो। ग्याङसँग जोडिएका एक सदस्यले पहिले पनि चेतावनी दिएका थिए । सलमान खानसँग काम गर्ने जो कोहीले परिणाम भोग्नुपर्नेछ।

बिश्नोई ग्याङ र सलमानबीचको विवाद सन् १९९८ को कालो हरिण शिकार मुद्दासँग जोडिएको छ। बिश्नोई समुदायले कालो हरिणलाई पवित्र मान्ने भएकाले यो विवाद लामो समयदेखि जारी छ।

यसै कारण ग्याङले सलमान खान र उनका नजिकका मानिसहरूलाई लगातार धम्की दिँदै आएको बताइन्छ।

आफ्नो फिल्म ‘किस किसको प्यार करूँ २’ को ट्रेलर लन्चको क्रममा कपिल शर्माले यी घटनाबारे चिन्ता व्यक्त गरेका थिए। उनले भनेका थिए कि उनलाई लाग्छ क्यानडाको कानून र प्रहरीले यस्ता घटनाहरूलाई पूर्ण रूपमा नियन्त्रण गर्न सक्षम छैनन्।

यी आक्रमणपछि मुम्बई प्रहरीले सुरक्षाका कारण भारतमा उनको सुरक्षा व्यवस्था पनि बढाएको थियो।