काठमाडौं। सम्पत्ति शुद्धीकरण विभाग को टोलीले बागमती प्रदेशका मुख्यमन्त्री इन्द्रबहादुर बानियाँ को घर तथा निर्माण कम्पनीका कार्यालयमा सोमबार छापा मारेको छ।

सम्पत्ति शुद्धीकरणसम्बन्धी उजुरीका आधारमा अनुसन्धान अघि बढाउँदै विभागको टोलीले बानियाँको निवास र उनकै स्वामित्वमा रहेको निर्माण कम्पनीको कार्यालयमा छापा मारेको जनाएको छ।

छापा मार्न विभागको टोली काठमाडौंबाट हेटौँडा पुगेको थियो। स्रोतका अनुसार टोली मध्याह्न करिब १२ बजे बानियाँको हेटौँडास्थित निवासमा पुगेको र करिब दुई घण्टापछि, २ बजे आसपास बाहिरिएको थियो।

अनुसन्धानमा संलग्न एक अधिकारीका अनुसार हेटौँडा-५, पिप्लेस्थित बानियाँ निर्माण सेवा (बीएनएस) कम्पनीको कार्यालयमा पनि छापा मारिएको छ। सो क्रममा आवश्यक कागजातहरू अनुसन्धानका लागि नियन्त्रणमा लिइएको बताइएको छ।

यस्तै मुख्यमन्त्री बानियाँको घरमा विभागका करिब ७ सदस्यीय टोलीले खोजतलास गरेको जनाइएको छ। यद्यपि, नियन्त्रणमा लिइएका कागजातको विस्तृत विवरण भने सार्वजनिक गरिएको छैन।

बानियाँ निकट स्रोतका अनुसार उनी संसदीय दलको बैठकमा सहभागी रहेका बेला छापा मारिएको जानकारी पाएका थिए। उक्त बैठकमा सभामुख चयन र मन्त्रिपरिषद् फेरबदल सम्बन्धी विषयमा छलफल भइरहेको बताइएको छ।

यस विषयमा  बानियाँले कुनै प्रतिक्रिया दिएका छैनन्।