काठमाडौं । नेपाल राष्ट्र बैंकले बैंक तथा वित्तीय संस्थाहरूमा ७ अर्ब ३० करोड रुपैयाँ लगानी गर्न तयारी गरेको छ। राष्ट्र बैंकको उपदान तथा पेन्सन कोषमा रहेको रकमलाई ३६६ दिनका मुद्दती निक्षेप रूपमा लगानी गर्ने निर्णय भएको हो।

आज सार्वजनिक गरिएको सूचनाअनुसार, कुल रकममध्ये ५ अर्ब ८४ करोड वाणिज्य बैंकहरूमा, १ अर्ब ९ करोड ५० लाख राष्ट्रिय स्तरका विकास बैंकहरूमा तथा ३६ करोड ५० लाख राष्ट्रिय स्तरका फाइनान्स कम्पनीहरूमा परिचालन गरिनेछ।

यो रकम लिन इच्छुक बैंक तथा वित्तीय संस्थाहरूलाई प्रस्तावित ब्याजदरसमेत उल्लेख गरी वैशाख २३ गतेभित्र आवेदन दिन आग्रह गरिएको सूचनामा उल्लेख गरिएको छ।