काठमाडौं। चितवन, कैलाली, झापा, सुनसरी, बाँके, उदयपुर, तनहुँ, बर्दिया र धनकुटा लगायत विभिन्न जिल्लामा प्रहरीले सञ्चालन गरेको विशेष कारबाहीमा लागूऔषध सहित ३० भन्दा बढी व्यक्ति पक्राउ परेका छन्।

चितवनको भरतपुर महानगरपालिका-११ कमलादेवीमाई टोलबाट करिब २ सय ग्राम गाँजा सहित ३७ वर्षीय अन्सु श्रेष्ठ पक्राउ परेका छन्। अस्थायी प्रहरी पोष्ट भोजाडबाट खटिएको टोलीले उनलाई नियन्त्रणमा लिएको हो।

यस्तै भरतपुर–१५ शान्ति चोकबाट ३२ वर्षीय रूपेश लामा खैरो हेरोइन जस्तो देखिने ५ ग्राम २ सय ६० मिलिग्राम पदार्थ, डिजिटल तराजु र नगद सहित पक्राउ परेका छन्।

कैलालीको धनगढी उपमहानगरपालिका-८ बाट ब्राउनसुगर जस्तो देखिने पदार्थ सहित ३ जना पक्राउ परेका छन् भने झापाको भद्रपुर, मेचीनगर र अन्य स्थानबाट पनि ब्राउनसुगर र खैरो हेरोइन सहित ६ जना पक्राउ परेका छन्।

सुनसरीको देवानगञ्ज र धरान क्षेत्रमा लागूऔषध सहित ३ जना पक्राउ परेका छन्। बाँकेको नेपालगन्जमा पनि ब्राउनसुगर सहित २ जना पक्राउ परेका छन्।

उदयपुरको चौदण्डीगढी नगरपालिका क्षेत्रमा ट्रामाडोल र डाइक्लोमाइन सहित ३ जना पक्राउ परेका छन्। तनहुँको व्यास नगरपालिका क्षेत्रमा २७ वर्षीय ईनाम गुरुङ लागूऔषध सहित पक्राउ परेका छन्।

बर्दियाको गुलरिया र अन्य स्थानमा ब्राउनसुगर सहित २ जना पक्राउ परेका छन् भने धनकुटाको हिलेबाट खैरो हेरोइन जस्तो देखिने पदार्थ सहित २ जना पक्राउ परेका छन्।

प्रहरीका अनुसार सबै घटनामा अनुसन्धान जारी रहेको छ। केही फरार व्यक्तिहरूको खोजी कार्य पनि तीव्र पारिएको छ।