काठमाडौँ ।  नेपाली कांग्रेसका विभिन्न भ्रातृ संगठनका पदाधिकारी पदमुक्त भएपछि अहिले ती संगठनहरूमा नयाँ नेतृत्वका लागि चहल पहल तीव्र बनेको छ। रिक्त पदहरू परिपुर्तीको लागि पार्टीभित्र मनोनयनको तयारी सुरु भएको छ भने सम्भावित नामहरूबारे व्यापक चर्चा सुरु भएको हो।

नेपाल महिला संघमा नयाँ नेतृत्वका लागि मिना खरेलको नाम सबभन्दा अगाडि रहेको चर्चा छ। संगठनमा उनी प्रभावशाली नेतृका रूपमा स्थापित भएकाले उनको मनोनयनलाई बढी सम्भावना भएको कांग्रेस निकट स्रोतले बताउछ । 

२१ फागुनमा भएको प्रतिनिधिसभा निर्वाचनमा खरेल चितवन क्षेत्र नम्बर-२ बाट उम्मेदवार समेत थिइन्। तर त्यो क्षेत्रबाट राष्ट्रिय स्वतन्त्र पार्टीका सभापति रवि लामिछाने निर्वाचित भए। खरेलको चितवन लगायत देशैभरका कांग्रेसका युवा तथा महिलामाझ राम्रो छवि रहेको बताइन्छ।

त्यस्तै, नेपाल विद्यार्थी संघ (नेविसंघ)मा नयाँ अनुहारको रूपमा आदित्य दास चर्चामा छन्। विद्यार्थी राजनीतिमा सक्रिय दासलाई नेविसंघको केन्द्रीय नेतृत्वमा ल्याउनेबारे आन्तरिकरूपमा छलफल भइरहेको पार्टी स्रोतले जनाएको छ।

नेविसंघका निवर्तमान सभापति दुजाङ शेर्पाले पद छाडेको घोषणा गरेसँगै दास नयाँ नेतृत्वको रुपमा चर्चामा आएका हुन्। उनी त्रिभुवन विश्वविधालय अन्तर्गत चाबेल, मित्रपार्कस्थित पशुपति बहुमुखी क्याम्पसबाट विगत लामो समयदेखि विधार्थी राजनीतिमा सक्रीय छन्। 

नेपाल तरुण दलमा मनिष कोईरालाको नाम प्रबल रूपमा अघि सारिएको चर्चा छ । संगठन विस्तार, युवा परिचालन र आन्तरिक व्यवस्थापनमा सक्रिय कोईरालालाई नयाँ नेतृत्वका लागि उपयुक्त मानिँदैछ। यसअघि तरुण दलको अध्यक्ष विद्वान गुरुङ थिए। उनले पनि केही दिनअघि मात्रै पदबाट राजीनामा दिएको घोषणा गरेका थिए। 

कांग्रेसभित्र रिक्त भएका भ्रातृसंस्थाहरूमा मनोनयन प्रक्रिया छिट्टै अघि बढाइने जनाइएको छ। पार्टी स्रोतका अनुसार नयाँ नेतृत्व घोषणासँगै यी संगठनहरूको गतिविधि फेरि सक्रिय हुने अपेक्षा गरिएको छ।