काठमाडौं । नेकपा एमालेका अध्यक्ष केपी शर्मा ओलीले सुदूरपश्चिम प्रदेशका एमाले सांसदहरूसँग छलफल गरेका छन्। बुधबार ओलीको भक्तपुरस्थित निजी निवास गुन्डुमा उक्त छलफल भएको हो।

पार्टीभित्र सुदूरपश्चिम प्रदेशमा देखिएको पछिल्लो विवादका विषयमा केन्द्रित रहेर छलफल गरिएको स्रोतले जनाएको छ। विशेषगरी एमाले सुदूरपश्चिम प्रदेश सभाका संसदीय दलका नेता राजेन्द्र सिंह रावलको कार्यशैलीलाई लिएर पार्टीभित्रै असन्तुष्टि र प्रश्नहरू उठ्दै आएको विषयमा पनि छलफल भएको बताइएको छ।

निकटस्थ स्रोतका अनुसार बैठकमा प्रदेश संगठनको आन्तरिक समन्वय, नेतृत्वको भूमिकासँगै आगामी राजनीतिक रणनीतिबारे पनि विचार विमर्श गरिएको थियो।

सुदूरपश्चिममा देखिएको विवादलाई समाधान गर्दै पार्टी एकता मजबुत बनाउने विषयमा नेताहरूबीच छलफल केन्द्रित रहेको जनाइएको छ।