एजेन्सी। संयुक्त राज्य अमेरिका युरोपमा आफ्नो सैन्य उपस्थिति अझै विस्तार गर्दै गएको छ। अनुसन्धानकर्ताहरूका अनुसार अमेरिका दर्जनौं सैन्य अड्डामार्फत युरोपमा सक्रिय छ, जहाँ करिब ८० हजारभन्दा बढी सैनिक तैनाथ छन्।

दोस्रो विश्वयुद्धपछि युरोपको सुरक्षा संरचनामा अमेरिकाको उपस्थिति प्रमुख आधारका रूपमा रहँदै आएको छ। हाल यो उपस्थिति मुख्यतः जर्मनी, इटाली, बेलायत र पोल्याण्डमा केन्द्रित छ।

काउन्सिल अन फरेन रिलेसन्सका अनुसार सन् २०२५ को सुरुवातसम्म युरोपमा अमेरिकी सैनिकहरूको संख्या करिब ८४ हजार रहेको छ। युक्रेन युद्धपछि पूर्वी युरोपमा थप तैनाती हुँदा यो संख्या केही समय ७५ हजारदेखि १ लाख ५ हजारसम्म पुगेको पनि उल्लेख गरिएको छ।

सबैभन्दा ठूलो अमेरिकी सैन्य उपस्थिति जर्मनीमा छ। यहाँ रामस्टाइन एयर बेस रहेको छ, जुन अमेरिका बाहिरको सबैभन्दा ठूलो हवाई अड्डा मानिन्छ। युरोप र अफ्रिकाका लागि अमेरिकी सेनाको मुख्यालय स्टुटगार्टमा तथा युरोप कमान्डको केन्द्र विसबाडेनमा अवस्थित छ। जर्मनीमा मात्र करिब ३८ हजार अमेरिकी सैनिक तैनाथ छन्।

इटालीमा पनि अमेरिकी सेनाको उल्लेखनीय उपस्थिति छ। यहाँ पाँचवटा अड्डा सञ्चालनमा छन्, जसमा एवियानो एयर बेस प्रमुख हो। करिब ८ हजारभन्दा बढी अमेरिकी सैनिक यहाँ तैनाथ छन्। सिगोनेला नौसैनिक अड्डा र नेपल्सस्थित कमान्ड केन्द्र भूमध्यसागरीय रणनीतिका दृष्टिले महत्वपूर्ण मानिन्छ।

बेलायतमा पनि आरएएफ लेकनहीथ, मिल्डेनहोल र फेयरफोर्ड जस्ता महत्वपूर्ण अड्डाहरू छन्, जहाँ एफ-३५ लडाकु विमानदेखि बमवर्षक विमानसम्म तैनाथ गरिएका छन्। पोल्याण्डमा रेडजिकोभो, लास्क एयर बेस र अन्य अग्रिम अड्डाहरूले नेटोको पूर्वी सुरक्षा रणनीतिमा महत्वपूर्ण भूमिका खेलिरहेका छन्।

टर्कीको इन्सिरलिक एयर बेस पनि अमेरिका र नेटोका लागि मध्यपूर्व तथा भूमध्यसागर क्षेत्रमा रणनीतिक रूपमा महत्वपूर्ण मानिन्छ।

अमेरिकी सेनाको भूमिकामा सीमा सुरक्षा, सैन्य सामग्री आपूर्ति, प्रशिक्षण र संयुक्त सैन्य अभ्यास समावेश छन्। जर्मनीको बुसेल एयर बेसमा अमेरिकी सैनिकहरूले आणविक बमहरूको सुरक्षा जिम्मा पनि सम्हाल्दै आएका छन्।

युक्रेन युद्धपछि अमेरिका युक्रेनी सेनालाई हतियार, गोला-बारुद र सैन्य प्रशिक्षण उपलब्ध गराउन अझ सक्रिय बनेको छ। यसले युरोपमा अमेरिकी सैन्य संरचना केवल सुरक्षा होइन, रणनीतिक र भू-राजनीतिक प्रभाव विस्तारको आधार बनेको विश्लेषण गरिएको छ।