कोलकाता । भारतको पश्चिम बंगालमा निर्वाचन परिणामपछि हिंसात्मक घटना सुरु भएको छ। उत्तर २४ परगना जिल्लाको सन्देशखालीस्थित बामनघेरी क्षेत्रमा मंगलबार राति गस्तीमा रहेको प्रहरी र केन्द्रीय सुरक्षाबलमाथि आक्रमण भएको छ।

भारतीय सञ्चारमाध्यमका अनुसार अज्ञात समूहले गोली प्रहार गर्दा पाँच जना सुरक्षाकर्मी घाइते भएका छन्। घाइते हुनेहरूमा नाजाट प्रहरी चौकीका प्रमुख, एक प्रहरी जवान, एक महिला प्रहरी र केन्द्रीय बलका दुई जवान रहेका छन्।

पछिल्लो २४ घण्टामा राज्यका विभिन्न स्थानमा चार जनाको हत्या भएको रिपोर्ट आएको छ। मृतकमध्ये भारतीय जनता पार्टी र तृणमूल कांग्रेसका दुई-दुई कार्यकर्ता रहेको जनाइएको छ।

भारतीय जनता पार्टीले उत्तर २४ परगना क्षेत्रका न्यू टाउन र हावडाको उदय नारायणपुरमा आफ्ना दुई कार्यकर्ताको हत्या तृणमूल कांग्रेसका कार्यकर्ताबाट भएको आरोप लगाएको छ। यता, तृणमूल कांग्रेसले कोलकाताको बेलेघाटा र वीरभूमको नानुरमा आफ्ना दुई कार्यकर्ताको हत्या भएको दाबी गरेको छ।

यसैबीच, कोलकाताको न्यू मार्केट क्षेत्रमा भीडले तृणमूल कांग्रेसको पार्टी कार्यालय डोजर प्रयोग गरी भत्काएको छ। साथै आसपासका पसलहरूमा समेत तोडफोड भएको छ।

तृणमूल कांग्रेसले सामाजिक सञ्जालमार्फत चुनावपछि ‘परिवर्तन’को नाममा हिंसा फैलिएको आरोप लगाएको छ। प्रहरीले घटनाबारे अनुसन्धान जारी राखेको जनाएको छ।