काठमाडौं। प्रतिष्ठित कान्स फिल्म फेस्टिभल अन्तर्गतको ‘अन सर्टेन रिगार्ड’ विधामा विश्व प्रिमियर हुन लागेको नेपाली फिल्म ‘एलिफेन्ट्स इन द फग’ ले अन्तर्राष्ट्रिय प्रदर्शनका लागि पहिलो वितरण सम्झौता गरेको छ । फिल्मको अन्तर्राष्ट्रिय बिक्री अधिकार ‘बेस्ट फ्रेन्ड फरेभर’ले प्राप्त गरेको हो । साथै, निर्माण टिमले फिल्मको ट्रेलर पनि सार्वजनिक गरेको छ ।

फ्रान्समा फिल्मलाई ‘अरिजोना डिस्ट्रीब्युसन’ र ‘ले भाल्सेउर डिस्ट्रीब्युसन’ले संयुक्त रूपमा प्रदर्शन गर्ने भएका छन् । यस्तै, जर्मनी र अस्ट्रियामा प्रदर्शन अधिकार ‘मिसिङ फिल्म्स’ले खरिद गरेको छ भने ब्राजिलमा ‘इमोभिजन’ले फिल्म प्रदर्शन गर्नेछ । नेपालभित्र भने ‘द टी फोक्स फिल्म्स’ले वितरणको जिम्मा लिएको छ ।

‘एलिफेन्ट्स इन द फग’ को कान्समा मे २० मा प्रिमियर हुनेछ भने मे २१ मा निर्माण टिम रेडकार्पेट कार्यक्रममा सहभागी हुनेछ । यो कान्स फिल्म महोत्सवमा छनोट हुने पहिलो नेपाली कथानक फिल्म बनेको छ । फिल्मका निर्देशक अविनाश विक्रम शाह हुन् ।

यसअघि शाहद्वारा निर्देशित छोटो फिल्म लोरीले सन् २०२२ को कान्स फिल्म महोत्सवमा विशेष सम्मान प्राप्त गरेको थियो । उनले निर्देशक मीनबहादुर भाम को फिल्म साम्भालाको पटकथामा पनि सहकार्य गरेका थिए । उक्त फिल्म सन् २०२४ को बर्लिन इन्टरनेसनल फिल्म फेस्टिभलको मुख्य प्रतिस्पर्धात्मक विधामा प्रदर्शन गरिएको थियो ।