काठमाडौं । सार्वजनिक यातायातमा यात्रुको नगद पाकेटमारी गरी फरार भएका दुई जनालाई प्रहरीले पक्राउ गरेको छ ।

वैशाख २९ गते बिहान काठमाडौं महानगरपालिका–२६ नयाँ बसपार्कबाट बसुन्धारातर्फ गइरहेको सार्वजनिक बसभित्र भिडभाडको मौका छोपी एक यात्रुको ४५ हजार रुपैयाँ चोरी भएको प्रहरीले जनाएको छ ।

घटनामा संलग्न रहेको आरोपमा प्रहरीले सोही दिन दिउँसो सामाखुशी क्षेत्रबाट सिन्धुपाल्चोक लिसंखुपाखा गाउँपालिका–१ घर भई हाल काठमाडौंको मितेरी पुल बस्ने ४१ वर्षीय पूर्णबहादुर विक र २८ वर्षीय सुकमान गदारलाई पक्राउ गरेको हो ।

प्रहरीका अनुसार पक्राउ परेका पूर्णबहादुर पुराना अपराधी रहेको खुलेको छ । उनीमाथि २०६२ देखि २०८१ सालसम्म चोरी, लागुऔषध तथा अभद्र व्यवहारलगायत मुद्दामा १३ पटकसम्म कानुनी कारबाही चलाइएको विवरण फेला परेको प्रहरीले जनाएको छ ।

प्रहरी उपरीक्षक रामेश्वर कार्कीका अनुसार अपराध अनुसन्धान कार्यालयबाट खटिएको विशेष टोलीले उनीहरूलाई पक्राउ गरी थप अनुसन्धान तथा कानुनी कारबाहीका लागि जिल्ला प्रहरी परिसर पठाएको छ ।