पाकिस्तान। पाकिस्तानको दक्षिण–पश्चिमी प्रान्त बलुचिस्तानमा भएको झडपमा पाँच जना सैनिक र सात जना आतंकवादी गरी कुल १२ जनाको मृत्यु भएको पाकिस्तानी अधिकारीहरूले बिहीबार पुष्टि गरेका छन् ।

अधिकारीहरूका अनुसार आतंकवादीहरूले सैनिकहरूको समूह नजिकै विस्फोटक उपकरण विस्फोट गराएपछि दुवै पक्षबीच भीषण झडप भएको थियो । उक्त विस्फोटपछि सुरु भएको अपरेसनका क्रममा थप गोली हानाहान हुँदा ठूलो मानवीय क्षति भएको बताइएको छ ।

एक वरिष्ठ अधिकारीलाई उद्धृत गर्दै एएफपीले जनाएअनुसार घटनामा पाँच जना सैनिकको मृत्यु भएको छ भने एक जना सैनिक गम्भीर घाइते भएका छन् ।

सेनाको मिडिया शाखाले जारी गरेको विज्ञप्तिमा अपरेसनका क्रममा आतंकवादीहरूको समूह पहिचान भएपछि कारबाही गरिएको र त्यसक्रममा सात जना आतङ्कवादी मारिएको उल्लेख गरिएको छ ।

विज्ञप्तिमा उक्त आक्रमणको जिम्मेवारी बलुचिस्तानको सबैभन्दा सक्रिय पृथकतावादी समूहले लिएको जनाइएको छ ।

संयुक्त राज्य अमेरिकाले आतङ्कवादी संगठनका रूपमा सूचीकृत गरेको उक्त समूहले सैन्य प्रतिष्ठान, प्रहरी तथा नागरिक प्रशासनका अधिकारीहरूलाई लक्षित गर्दै आक्रमण र आत्मघाती विस्फोटहरू गर्ने गरेको बताइन्छ ।

पछिल्ला वर्षहरूमा बीएलएले यस क्षेत्रमा कार्यरत अन्य प्रान्तका पाकिस्तानी तथा विदेशी ऊर्जा कम्पनीहरूमा समेत आक्रमण बढाएको उल्लेख गरिएको छ । गत वर्ष ४५० यात्रु बोकेको रेलमा भएको आक्रमणपछि पाकिस्तान सरकारले यस समूहविरुद्ध विशेष सैन्य अपरेसन तीव्र पारेको थियो ।