काठमाडौँ । अमेरिकी राष्ट्रपति डोनाल्ड ट्रम्प ले चीनको राजधानी बेइजिङमा चिनियाँ राष्ट्रपति सी जिन पिङ सँग उच्चस्तरीय भेटवार्ता गरेका छन् । बेइजिङस्थित ग्रेट हल अफ द पिपलमा भएको उक्त भेटमा चिनियाँ राष्ट्रपति सी जिनपिङले ट्रम्पलाई औपचारिक स्वागत गर्दै गार्ड अफ अनर प्रदान गरेका थिए । दुवै नेताले हात मिलाएर बैठकको सुरुवात गरेका थिए ।

करिब दुई घण्टा चलेको बैठकको प्रारम्भमा राष्ट्रपति जिनपिङले विश्व तीव्र गतिमा परिवर्तन भइरहेको सन्दर्भमा अमेरिका–चीन सम्बन्ध विश्व स्थिरताका लागि अत्यन्त महत्वपूर्ण रहेको बताएका थिए । उनले दुवै देश प्रतिस्पर्धी होइन, बरु साझेदार बन्नुपर्ने धारणा राखे ।

जवाफमा ट्रम्पले जिनपिङको प्रशंसा गर्दै उनलाई आफ्नो मित्र भन्न पाउनु सम्मानको विषय भएको उल्लेख गरे । उनले अमेरिका–चीन सम्बन्ध अझ सुदृढ हुने विश्वास व्यक्त गरे ।

बैठकमा ट्रम्पले आफू ठूला अमेरिकी व्यापारिक समूहका नेतासहित चीन आएको बताएका थिए । यस भ्रमणका क्रममा अमेरिकी विमान निर्माता कम्पनी बोइङसँग ठूलो सम्झौताको सम्भावना चर्चामा रहेको छ । रिपोर्टअनुसार चीनले करिब नौ लाख करोड रुपैयाँ बराबरका विमान खरिद गर्ने तयारी गरेको हुनसक्ने बताइएको छ, जसले यो सम्झौता विश्वकै ठूलो उड्डयन सम्झौतामध्ये एक बन्न सक्ने अनुमान गरिएको छ ।

बैठकमा व्यापार, भन्सार कर, अर्धचालक प्रविधि, कृत्रिम बुद्धिमत्ता, ताइवान र इरानलगायत विषयमा विस्तृत छलफल भएको जनाइएको छ । पछिल्ला वर्षहरूमा यी मुद्दाहरूलाई लिएर अमेरिका र चीनबीच तनाव कायम रहँदै आएको छ ।

भेटपछि जिनपिङले अमेरिकी व्यापारिक प्रतिनिधिमण्डलसँग समेत छलफल गरेका थिए । उनले चीनको बजार अमेरिकी कम्पनीका लागि अझ खुला हुँदै जाने र थप अवसर सिर्जना हुने बताएका थिए । चिनियाँ समाचार संस्था सिन्ह्वाका अनुसार उनले अमेरिकी कम्पनीहरूले चीनको विकासमा लामो समयदेखि योगदान दिइरहेको उल्लेख गर्दै दुवै देश लाभान्वित भएको बताएका थिए ।

जिनपिङले अमेरिका–चीनबीच पारस्परिक सहकार्य सुदृढ गर्नुपर्नेमा जोड दिँदै अमेरिकी कम्पनीहरूका लागि चीनमा अझ ठूलो अवसर रहेको बताए । यता ट्रम्पले लामो समयदेखि चीनसँग अमेरिकी सामान खरिद बढाउन दबाब दिँदै आएका छन् ।

बैठकका क्रममा जिनपिङले ताइवान मुद्दा अमेरिका–चीन सम्बन्धको सबैभन्दा संवेदनशील विषय भएको उल्लेख गर्दै यसको उचित व्यवस्थापन नभए द्विपक्षीय सम्बन्ध जोखिममा पर्न सक्ने चेतावनी दिएका थिए । उनले ताइवान मुद्दा सही ढंगले सम्हालिए मात्र सम्बन्धमा स्थिरता कायम रहन सक्ने बताएका थिए ।

ताइवान विषय लामो समयदेखि दुई देशबीचको प्रमुख विवादको केन्द्र रहँदै आएको छ । चीनले ताइवानलाई आफ्नो भूभागको हिस्सा दाबी गर्दै आएको छ भने अमेरिकाले ताइवानलाई राजनीतिक तथा सैन्य समर्थन दिँदै आएको छ । पछिल्ला वर्षहरूमा अमेरिकाले ताइवानका लागि अर्बौं डलर बराबरको हतियार सहायता प्याकेज स्वीकृत गरेकोमा चीनले निरन्तर आपत्ति जनाउँदै आएको छ ।

बैठकका क्रममा जिनपिङले व्यापार युद्धमा कुनै पक्षको जित नहुने बताएका थिए । उनले अमेरिका–चीन आर्थिक सम्बन्ध पारस्परिक लाभ र सहकार्यमा आधारित रहेको उल्लेख गर्दै सकारात्मक वातावरण कायम राख्न दुवै देशले मिलेर काम गर्नुपर्ने धारणा राखेका थिए ।