काठमाडौं। वैदेशिक रोजगारीका नाममा करिब ९७ लाख ५८ हजार रुपैयाँ ठगी गरेको अभियोगमा प्रहरीले ६ जनालाई पक्राउ गरेको छ। पक्राउ परेकामाथि विभिन्न देश पठाइदिने प्रलोभन देखाएर रकम असुली गरेको आरोप लागेको छ।

केन्द्रीय प्रहरी समाचारकक्षका अनुसार पक्राउ पर्नेहरूमा उदयपुरका रामबहादुर आलेमगर, सुनसरी लहानका आशिष कार्की, काठमाडौं टोखाका लोकबहादुर श्रेष्ठ र तुलसा पुनमगर, पाल्पा तानसेनका कृष्णप्रसाद पोखरेल तथा काठमाडौं चन्द्रागिरिका प्रवीण श्रेष्ठ रहेका छन्।

अनुसार अभियुक्तहरूले अमेरिका, क्यानडा, न्युजिल्याण्ड, बेलायत, दुबई र सर्बिया पठाइदिने भन्दै पीडितहरूबाट लाखौँ रुपैयाँ असुलेका थिए।

रामबहादुर आलेमगरले क्यानडा पठाउने भन्दै चार जनाबाट ३९ लाख ५८ हजार रुपैयाँ लिएको आरोप छ। आशिष कार्कीले न्युजिल्याण्ड पठाइदिन्छु भन्दै तीन जनाबाट १३ लाख रुपैयाँ ठगेको बताइएको छ। त्यस्तै लोकबहादुर श्रेष्ठले बेलायत पठाइदिने भन्दै एक जनाबाट १९ लाख रुपैयाँ लिएको खुलासा भएको छ।

यसैगरी तुलसा पुनमगरले अमेरिका पठाइदिने भन्दै एक जनाबाट १० लाख रुपैयाँ, कृष्णप्रसाद पोखरेलले दुबई जाने अवसर देखाएर १० लाख रुपैयाँ र प्रवीण श्रेष्ठले सर्बिया पठाइदिन्छु भन्दै एक जनाबाट ६ लाख रुपैयाँ ठगेको प्रहरीको दाबी छ।

प्रहरीले उनीहरूमाथि थप अनुसन्धान भइरहेको जनाएको छ।