मध्यपूर्व युद्धका कारण सन् २०२६ को पहिलो तीन महिनामा कुल गार्हस्थ्य उत्पादन सङ्कुचित भएपछि फ्रान्सको केन्द्रीय बैङ्कले आगामी हप्ताहरूमा आफ्नो आर्थिक वृद्धिको पूर्वानुमानलाई कटौती गर्न लागिएको निवर्तमान गभर्नरले सोमबार बताउनुभएको छ ।“त्यहाँ धेरै परिदृश्यहरू छन् र पहिलो त्रैमासिकमा अप्रिय आश्चर्यलाई ध्यानमा राख्दै सन् २०२६ को वृद्धि पूर्वानुमान हामीले मार्चमा दिएको तथ्याङ्कबाट संशोधन गरिनेछ,” फ्राँस्वाँ भिलेरोय डे गाल्हाउले रेडियो क्लासिकसँग भन्नुभयो ।

दोस्रो त्रैमासिकमा कुल गार्हस्थ उत्पादन फेरि घट्यो भने देशमा यी अधिकांश परिदृश्यहरूमा पूर्वानुमान सकारात्मक रहनेछ। यद्यपि, उहाँले देशको सम्भावित मन्दीको बारेमा अहिले नै केही नबोल्ने बताउनुभयो ।उहाँले तेलको मूल्यमा के हुने हो भनेर मध्यपूर्व द्वन्द्वको अवधिबारे धेरै अनिश्चितताहरू रहेको चेतावनी दिनुभएको छ।

“जब तपाईं विवरणहरू हेर्नुहुन्छ, त्यहाँ केवल निर्यातको लागि मात्र होइन, घरेलु उपभोग, घरेलु लगानी र कर्पोरेट लगानीजस्ता घरेलु मागको लागि पनि मन्दी छ,” भिलेरोय डे गाल्हाउले भन्नुभयो ।

पहिलो त्रैमासिकमा फ्रान्सको कूल ग्रार्हस्थ उत्पादन ०.१ प्रतिशतले खुम्चिएको शुक्रबार सार्वजनिक गरिएको सरकारी तथ्याङ्कले देखाएको छ । यो एक आश्चर्यजनक गिरावटले सरकारको पूर्ण वर्षको ०.९ प्रतिशतको वृद्धिको आधिकारिक पूर्वानुमानमा शङ्का उत्पन्न गरेको छ।गत मे महिनामा अन्तर्राष्ट्रिय मुद्रा कोषले पहिलेको अनुमानलाई संशोधन गर्दै फ्रान्सको आर्थिक वृद्धिदर ०.७ प्रतिशत रहने पूर्वानुमान गरेको थियो ।

युरोपेली केन्द्रीय बैङ्कको दर–निर्धारण गभर्निङ काउन्सिलका सदस्य भिलेरोय डे गाल्हाउले फेब्रुअरीमा जूनको अन्त्यसम्म आफ्नो पद छोड्ने घोषणा गर्नुभएको थियो । उहाँको यो निर्णय कार्यकाल समाप्त हुनुभन्दा १८ महिना अघि आएको हो ।

उहाँको स्थानमा राष्ट्रपति इमानुएल माक्रोँका पूर्व ‘चिफ अफ स्टाफ’ इम्यानुएल मौलिनलाई नियुक्त गरिएको छ, यो कदम आलोचकहरूले आगामी मे महिनामा म्याक्रोँको कार्यकाल समाप्त हुनुअघि सहयोगीहरूलाई शीर्ष पदमा स्थापित गर्ने कदमको एक हिस्सा भएको बताएका छन्।