सुनसरी। इनरुवा नगरपालिका–६ स्थित सीतल सेकुवा कर्नरमा तास खेलिरहेको अवस्थामा १२ जना पक्राउ परेका छन्।

जिल्ला प्रहरी कार्यालय सुनसरीका अनुसार विशेष सूचनाका आधारमा खटिएको प्रहरी टोलीले गएराति छापा मारेर उनीहरूलाई तासको खालबाट नियन्त्रणमा लिएको हो।

प्रहरी उपरीक्षक केशवकुमार थेवेका अनुसार उक्त स्थानबाट नगद एक लाख एक हजार सात सय पैतीस रुपैयाँ र एक बुङ तास बरामद गरिएको छ।

पक्राउ पर्नेहरूमा इनरुवा–६ बस्ने ४७ वर्षीय जुनलक राई, इनरुवा–९ बस्ने २८ वर्षीय ताहिर साफी, इनरुवा–६ बस्ने ६० वर्षीय रामप्रसाद चौलागाईं, इनरुवा–८ बस्ने ३७ वर्षीय उमेश साह हलुवाई र इनरुवा–६ बस्ने ४७ वर्षीय विनोद बोगटी रहेका छन्।

त्यस्तै सीतल सेकुवा कर्नरका सञ्चालक ५९ वर्षीय शुरबहादुर राउत, इनरुवा–८ बस्ने २९ वर्षीय नजावुल मियाँ, २५ वर्षीय अमिर मियाँ, भोक्राहा नरसिंह गाउँपालिका–२ बस्ने २७ वर्षीय फारुक अन्सारी, २२ वर्षीय मफूज अन्सारी, रामधुनी नगरपालिका–९ बस्ने ३३ वर्षीय उमेश सदा र कोशी गाउँपालिका–१ बस्ने ३४ वर्षीय बैजनाथ यादवलाई पनि नियन्त्रणमा लिइएको प्रहरीले जनाएको छ।

उनीहरूलाई जिल्ला प्रहरी कार्यालय सुनसरीमा राखी थप अनुसन्धान भइरहेको छ।