काठमाडौं। राष्ट्रिय प्रजातन्त्र पार्टी फुटेको छ । पार्टीका केही वरिष्ठ नेता तथा पदाधिकारीहरूले पार्टीको वर्तमान नेतृत्वमाथि वैचारिक विचलन, संगठनात्मक कमजोरी र आन्तरिक लोकतन्त्रको अभावको आरोप लगाउँदै पहिलो चरणमा पार्टी परित्याग गरेको घोषणा गरेका छन्।

जेठ २१ गते जारी संयुक्त वक्तव्यमा उनीहरूले आरपीपीको मूल वैचारिक आधार संवैधानिक राजसंस्था र हिन्दु राष्ट्रको पक्षमा रहेको उल्लेख गर्दै वर्तमान नेतृत्व त्यस लक्ष्यबाट विचलित भएको आरोप लगाएका छन्। वक्तव्यमा पार्टीको नेतृत्वले गणतन्त्र सुदृढीकरणतर्फ झुकाव देखाएको र पार्टीको मूल उद्देश्य तथा महाधिवेशनका निर्णयहरूलाई बेवास्ता गरेको दाबी गरिएको छ।

असन्तुष्ट नेताहरूले पार्टीभित्र पारदर्शिता, जवाफदेहिता र विधिसम्मत अभ्यास कमजोर बन्दै गएको आरोप पनि लगाएका छन्। उनीहरूका अनुसार नेतृत्वको कार्यशैली, आन्तरिक मतभिन्नताप्रतिको व्यवहार तथा संगठन सञ्चालनका विषयमा उठाइएका प्रश्नहरूको उचित सम्बोधन हुन नसक्दा पार्टीको जनाधार खस्किएको छ।

वक्तव्यमा वरिष्ठ नेता तथा कार्यकर्ताहरूको योगदानको सम्मान हुन नसकेको, पार्टी विधानको पूर्ण पालना नभएको तथा फरक मत राख्नेहरूमाथि अनुशासनात्मक दबाब सिर्जना गरिएको आरोप समेत लगाइएको छ।

पहिलो चरणमा पार्टी परित्याग गर्ने नेताहरूमा महामन्त्री, डा. धवलशम्शेर राणा, उपाध्यक्ष मुकुन्दश्याम गिरी, पूर्वमन्त्री दिलनाथ गिरी लगायतका नेता रहेका छन्।

पार्टीभित्र केही समययता देखिएको असन्तुष्टि र नेतृत्वसँगको मतभेदका कारण यो कदम चालिएको बताइएको छ। असन्तुष्ट पक्षले आगामी दिनमा थप नेताहरू तथा कार्यकर्ताहरू पनि आफ्नो अभियानमा जोडिन सक्ने संकेत दिएको छ।

उनीहरूले आफूहरू पार्टीको स्थापना कालदेखि अघि सारिएका सिद्धान्त र मूल्यप्रति प्रतिबद्ध रहेको उल्लेख गर्दै वैकल्पिक राजनीतिक यात्राबारे आगामी दिनमा थप निर्णय सार्वजनिक गरिने बताएका छन्।

यस घटनाक्रमले आरपीपीको आन्तरिक राजनीतिमा नयाँ तरंग ल्याएको छ भने पार्टीभित्र थप ध्रुवीकरण हुने सम्भावनाबारे राजनीतिक वृत्तमा चर्चा सुरु भएको छ।

सूची: