काठमाडौं। भक्तपुरको सूर्यविनायक नगरपालिकामा छोराले कुटपिट गर्दा एक महिलाको मृत्यु भएको छ।

घटनामा संलग्न आरोपित छोरालाई प्रहरीले पक्राउ गरी अनुसन्धान अघि बढाएको हाे।

जिल्ला प्रहरी परिसर भक्तपुरका अनुसार उदयपुरको कटारी नगरपालिका-५ स्थायी घर भई हाल सूर्यविनायक नगरपालिका-९ भातेढिकुर बस्दै आएकी ४० वर्षीया मेघिया चौधरीमाथि शुक्रबार साँझ करिब ७:४५ बजे उनका २४ वर्षीय छोरा किरण चौधरीले कुटपिट गरेका थिए।

कुटपिटबाट गम्भीर घाइते भएकी मेघियालाई तत्काल उपचारका लागि ललितपुरस्थित पाटन अस्पताल पुर्‍याइएको थियो। उपचारकै क्रममा राति करिब १ बजे उनको मृत्यु भएको प्रहरीले जनाएको छ।

घटनापछि प्रहरी वृत्त जगातीबाट खटिएको टोलीले आरोपित किरण चौधरीलाई नियन्त्रणमा लिएको छ।

घटनाको कारण र अन्य पक्षबारे प्रहरीले थप अनुसन्धान गरिरहेको जनाएको छ।