काठमाडौं। राष्ट्रिय मानवअधिकार आयोगले १८ वर्षमुनिका बालबालिकालाई राजनीतिक दलको सदस्यता दिएको विषयमा राष्ट्रिय स्वतन्त्र पार्टी (रास्वपा)सँग स्पष्टिकरण मागेको छ ।

आयोगले बुधबार पत्राचार गर्दै सञ्चारमाध्यममा सार्वजनिक भएको विवरणका आधारमा उक्त विषयबारे यथाशीघ्र जवाफ उपलब्ध गराउन आग्रह गरेको हो ।

हालै रास्वपाले बालबालिकालाई पार्टी सदस्यता दिएको दाबी सार्वजनिक भएपछि यस विषयले राजनीतिक वृत्तमा आलोचना र बहस निम्त्याएको छ । सोही सन्दर्भमा आयोगले पनि औपचारिक रूपमा चासो व्यक्त गरेको हो ।

आयोगले १८ वर्षमुनिका व्यक्तिलाई राजनीतिक दलको सदस्यता वितरण गरिएको भए त्यसले प्रचलित नेपाली कानुन तथा नेपालले अन्तर्राष्ट्रिय स्तरमा गरेका मानवअधिकारसम्बन्धी प्रतिबद्धताको उल्लङ्घन हुने भन्दै सचेत गराएको छ ।

यस विषयमा रास्वपाले दिने जवाफपछि थप अध्ययन र आवश्यक कदमबारे निर्णय हुने आयोग स्रोतले जनाएको छ ।

यो हेर्नुहोस् :