काठमाडौं। कर्तव्य ज्यान मुद्दामा २० वर्ष कैद सजाय सुनाइएका एक फरार अभियुक्तलाई कैलाली प्रहरीले २२ वर्षपछि पक्राउ गरेको छ।

अदालतको फैसला भएपछि कारागारबाट फरार भएका धनबहादुर घर्ती मगरलाई प्रहरीले शुक्रबार पक्राउ गरी पुनः कारागार चलान गरेको जनाएको हो।

कैलाली प्रहरीका अनुसार पक्राउ पर्नेमा टीकापुर नगरपालिका–१ बनगाउँ निवासी ४५ वर्षीय धनबहादुर घर्ती मगर रहेका छन्। उनी आफ्नै घरबाट पक्राउ परेका हुन्।

जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) योगेन्द्र तिमिल्सिनाका अनुसार मगरविरुद्ध कर्तव्य ज्यान मुद्दामा कैलाली जिल्ला अदालतले २०५६ चैत १३ गते २० वर्ष कैद सजाय सुनाएको थियो।

अदालतको फैसला कार्यान्वयनका क्रममा उनी कारागार चलान भएका थिए। तर २०६१ माघ २७ गते तत्कालीन नेकपा (माओवादी) ले कैलाली कारागारमा गरेको आक्रमणका क्रममा उनी अन्य केही कैदीसँगै जेल तोडेर फरार भएका थिए।

त्यसयता लामो समयदेखि फरार सूचीमा रहेका मगरको खोजी जारी रहेकामा प्रहरीले विशेष सूचनाका आधारमा उनलाई पक्राउ गरेको जनाएको छ।

पक्राउपछि मगरलाई कैलाली जिल्ला अदालतमा उपस्थित गराइएको थियो।

अदालतको आदेशअनुसार बाँकी कैद सजाय भुक्तानका लागि उनलाई पुनः कारागार चलान गरिएको जिल्ला प्रहरी कार्यालय कैलालीले जनाएको छ।