काठमाडौं। भारतको पञ्जाब राज्यस्थित तरनतारण जिल्लामा पारिवारिक विवादले दुई जनाको ज्यान जाने दुःखद घटना भएको छ।

श्रीमतीलाई सम्झाएर घर फर्काउन ससुराल पुगेका एक युवकलाई उनका सालाले ज्वलनशील पदार्थ खन्याएर आगो लगाएको आरोप लागेको छ। उनलाई बचाउने प्रयास गरेकी युवतीको पनि उपचारका क्रममा मृत्यु भएको छ।

भारतीय सञ्चारमाध्यमका अनुसार घटना गत जुन १३ मा तरनतारण जिल्लाको संघा गाउँमा भएको हो। घटनाको भिडियो हालै सामाजिक सञ्जालमा सार्वजनिक भएपछि यो विषय फेरि चर्चामा आएको छ।

मृतक लवप्रीत सिंह केही दिनअघि भएको पारिवारिक विवादपछि माइती गएकी आफ्नी श्रीमती सन्दीप कौरलाई फर्काउन ससुराल पुगेका थिए। सोही क्रममा उनका साला साजन सिंहले उनीमाथि ज्वलनशील पदार्थ खन्याएर आगो लगाएको आरोप लागेको प्रहरीले जनाएको छ।

आगो लागेपछि लवप्रीतलाई बचाउन उनकी साली गुरजीत कौर दौडिएकी थिइन्। तर उनी पनि आगोको चपेटामा परेर गम्भीर रूपमा घाइते भएकी थिइन्। दुवैलाई अस्पताल पुर्‍याइए पनि उपचारका क्रममा उनीहरूको मृत्यु भएको बताइएको छ।

घटनामा आरोपी साजन सिंह पनि आगोले जलेर घाइते भएका छन्। उनको अस्पतालमा उपचार भइरहेको प्रहरीले जनाएको छ।

प्रहरीले साजन सिंहविरुद्ध हत्या लगायतका कसुरमा मुद्दा दर्ता गरी घटनाबारे थप अनुसन्धान अघि बढाएको जनाएको छ।

भिडियो सामाजिक सञ्जालमा भाइरल

घटनासँग सम्बन्धित एउटा भिडियो सामाजिक सञ्जालमा व्यापक रूपमा फैलिएको छ। भिडियोमा एक व्यक्तिले अर्को व्यक्तिमाथि ज्वलनशील पदार्थ खन्याएको र त्यसपछि आगलागी भएको देखिन्छ। त्यसपछि एक महिला हस्तक्षेप गर्न पुगेको र उनी पनि आगोको चपेटामा परेको दृश्य देखिन्छ।

भिडियो सार्वजनिक भए पनि घटनाबारे अनुसन्धान जारी रहेकाले सम्बन्धित निकायको आधिकारिक निष्कर्ष आउन बाँकी रहेको छ।