पाँचथर । पाँचथरमा उत्पादित गोलभेँडाले उचित मूल्य नपाउँदा किसान समस्यामा परेका छन्। उत्पादन लागत बढ्दै गए पनि गोलभेँडा प्रतिकिलो १५–१७ रुपैयाँमै बिक्री हुन थालेपछि किसान घाटा बेहोर्न बाध्य भएका हुन्।

किसानका अनुसार प्रतिकिलो ३० रुपैयाँभन्दा कम मूल्यमा बिक्री गर्दा लागतसमेत उठ्दैन। तर झापा, मोरङ र सुनसरीका बजारमा बाहिरबाट गोलभेँडा बढी मात्रामा भित्रिँदा स्थानीय उत्पादनको मूल्य घटेको व्यवसायीहरू बताउँछन्।

पाँचथरको फिदिम नगरपालिका तथा हिलिहाङ र याङवरक गाउँपालिकामा व्यावसायिक रूपमा गोलभेँडा खेती हुँदै आएको छ। पहिलो सिजनको उत्पादनले मूल्य नपाए पनि आगामी सिजनमा बजार मूल्य सुध्रिने आशामा किसान छन्।