काठमाडौं — वैदेशिक रोजगार विभागले सेवाग्राहीको गुनासो तथा उजुरीको सुनुवाइलाई छिटो, पारदर्शी र व्यवस्थित बनाउन अनलाइन उजुरी व्यवस्थापन प्रणाली सञ्चालनमा ल्याएको छ।

विभागका अनुसार नयाँ प्रणाली लागू भएसँगै उजुरी दर्तादेखि कारबाहीको प्रगति र अन्तिम निर्णयसम्मका सबै प्रक्रिया डिजिटल माध्यमबाट सञ्चालन हुनेछन्। यसले सेवाग्राहीले पटक–पटक विभाग धाउनुपर्ने तथा फाइल बोकेर विभिन्न शाखामा जानुपर्ने बाध्यता अन्त्य हुने अपेक्षा गरिएको छ।

नयाँ प्रणालीमार्फत वैदेशिक रोजगारीका क्रममा ठगी, सम्झौता उल्लङ्घन, सेवा प्रदायक संस्था वा म्यानपावर कम्पनीविरुद्धका उजुरी अनलाइनमार्फत दर्ता गर्न सकिनेछ। दर्ता भएको उजुरीको अवस्था पनि सेवाग्राहीले अनलाइनमै ट्र्याक गर्न सक्ने व्यवस्था गरिएको विभागले जनाएको छ।

विभागका अनुसार यस प्रणालीले उजुरी व्यवस्थापनलाई थप पारदर्शी, प्रभावकारी र जवाफदेही बनाउनुका साथै सेवाप्रवाहमा सुशासन कायम गर्न सहयोग पुग्ने विश्वास लिइएको छ। साथै, कागजी प्रक्रिया घटाएर समय र खर्च दुवै बचत हुने विभागको भनाइ छ।

विभागले सेवाग्राहीलाई डिजिटल प्रणालीको अधिकतम उपयोग गर्न आग्रह गर्दै भविष्यमा वैदेशिक रोजगारसम्बन्धी थप सेवासमेत क्रमशः अनलाइनमार्फत उपलब्ध गराइने जनाएको छ।