काठमाडौं। लोक सेवा आयोगको तयारी गरिरहेका विद्यार्थीहरूले सरकारी पदपूर्तिसम्बन्धी नयाँ व्यवस्थाको विरोध गर्दै माइतीघर मण्डलामा प्रदर्शन गरेका छन्।

उनीहरूले साउन ४ गते मुख्यसचिवस्तरीय बैठकबाट पारित २२ बुँदे निर्णयको बुँदा नम्बर ११ तत्काल खारेज गर्न माग गरेका छन्।

प्रदर्शनकारीका अनुसार उक्त व्यवस्थाले लोक सेवा आयोगमार्फत हुने नियमित पदपूर्ति प्रक्रियामा अनावश्यक अवरोध सिर्जना गर्नेछ।

मुख्यसचिव गोविन्दबहादुर कार्कीको अध्यक्षतामा बसेको बैठकले चालु आर्थिक वर्षमा प्रधानमन्त्री तथा मन्त्रिपरिषद्को कार्यालयको स्वीकृतिबिना नयाँ दरबन्दी सिर्जना गर्न नपाइने निर्णय गरेको थियो।

त्यस्तै, स्थायी पदपूर्तिका लागि पनि सोही कार्यालयको स्वीकृतिबिना लोक सेवा आयोगमा माग पठाउन नपाइने व्यवस्था गरिएको छ। बैठकले अस्थायी पदपूर्ति नगर्ने निर्णयसमेत गरेको छ।

यही निर्णयका कारण लोक सेवा आयोगको नियमित विज्ञापन र रिक्त पदपूर्ति प्रक्रिया प्रभावित हुने तथा लामो समयदेखि परीक्षाको तयारी गरिरहेका उम्मेदवार अन्योलमा पर्ने भन्दै विद्यार्थीहरू आन्दोलनमा उत्रिएका हुन्।

प्रदर्शनकारीहरूले बुँदा नम्बर ११ फिर्ता लिएर पदपूर्ति प्रक्रिया नियमित रूपमा सञ्चालन गर्न सरकारसँग माग गरेका छन्।