काठमाडौं। जननायक विश्वेश्वरप्रसाद (बीपी) कोइरालाको ४४औँ स्मृति दिवस नेपाली कांग्रेसले यस वर्ष पनि मनायो। तर, यसपटक बीपीको विचारभन्दा कांग्रेसभित्रको विभाजन बढी देखियो।

एकातिर सभापति गगनकुमार थापा नेतृत्वको संस्थापन समूहले ‘ग्रिन रन’देखि जलवायु संवादसम्मका कार्यक्रम आयोजना गर्‍यो भने अर्कोतर्फ देउवा–पूर्णबहादुर खड्का समूहले छुट्टै स्मृति सभा गरेर आफ्नो राजनीतिक सन्देश दियो। एउटै पार्टीका दुई धारले एउटै दिन छुट्टाछुट्टै कार्यक्रम आयोजना गर्दा कांग्रेसभित्रको दूरी सार्वजनिक रूपमा थप प्रस्टिएको छ।

देउवा–खड्का समूहले आयोजना गरेको कार्यक्रममा सभापति गगन थापा, उपसभापति विश्वप्रकाश शर्मा लगायत संस्थापन पक्षका शीर्ष नेताहरू अनुपस्थित रहे। त्यस्तै बिहान संस्थापन पक्षले आयोजना गरेको ‘ग्रिन रन’मा पनि इतर समूहका नेताहरू देखिएनन्।

बीपीले जीवनभर राष्ट्रिय मेलमिलाप, सहमति र लोकतान्त्रिक एकताको राजनीति अघि सारेका थिए। तर उनकै स्मृति दिवसमा कांग्रेसभित्र दुई अलग मञ्च, दुई अलग सन्देश र दुई अलग शक्ति प्रदर्शन देखिनुले पार्टीभित्रको आन्तरिक संकट अझ गहिरिएको संकेत दिएको छ।

पछिल्ला महिनादेखि विशेष महाधिवेशन, केन्द्रीय कार्यसमितिको वैधानिकता, १५औँ महाधिवेशनको तयारी र संगठनात्मक संरचनालाई लिएर कांग्रेसभित्र विवाद चर्किँदै आएको छ। त्यसको प्रत्यक्ष प्रभाव बीपी स्मृति दिवसका कार्यक्रममै देखिएको हो।

बीपीको नाममा श्रद्धाञ्जलि अर्पण गरिए पनि उनको राजनीतिक दर्शनअनुसार एकताको सन्देश दिन नसक्दा यसपटकको स्मृति दिवस कांग्रेसका लागि आत्मसमीक्षाको विषय बनेको छ।

एउटै संस्थापक नेताको सम्झनामा समेत एउटै मञ्च साझा गर्न नसकेको कांग्रेसले आगामी दिनमा आन्तरिक मतभेद कसरी व्यवस्थापन गर्छ भन्ने प्रश्न अझ पेचिलो बनेको छ।

तस्वीरहरू: