काठमाडौं। संक्रमणकालीन न्याय प्रक्रियामा पीडितको अर्थपूर्ण सहभागिता सुनिश्चित गर्न माग गर्दै आम द्वन्द्वपीडित समुदायले बिहीबार काठमाडौंको माइतीघर मण्डलामा प्रदर्शन गरेका छन्।

प्रदर्शनकारीले पीडितको सहभागिताविना गरिने कुनै पनि न्यायिक निर्णय पीडितमैत्री हुन नसक्ने भन्दै सरकारको ध्यानाकर्षण गराएका छन्। उनीहरूले सत्य निरूपण तथा बेपत्ता व्यक्तिको छानबिन आयोग विश्वसनीय, स्वतन्त्र र पारदर्शी प्रक्रियामार्फत गठन गर्न माग गरेका छन्।

प्रदर्शनका क्रममा सहभागीहरूले संक्रमणकालीन न्यायलाई राजनीतिक सहमतिमा सीमित नगरी पीडितको अधिकार, सत्य, न्याय र परिपूरण सुनिश्चित हुने गरी आयोग गठन गर्नुपर्ने बताएका थिए।

द्वन्द्वपीडित समुदायले पीडितको विश्वास जित्ने गरी आयोग गठन नभए संक्रमणकालीन न्याय प्रक्रिया प्रभावकारी नहुने चेतावनीसमेत दिएका छन्।