काठमाडौं । आन्तरिक राजस्व कार्यालय लहान, सिरहाका कर अधिकृत युवराज पाल ५ लाख रुपैयाँ घुस लिँदै गरेको अवस्थामा अख्तियार दुरुपयोग अनुसन्धान आयोगको टोलीबाट पक्राउ परेका छन्।

अख्तियारको बर्दिबास कार्यालयबाट खटिएको टोलीले उनलाई कार्यालय परिसरमै रकम बुझिरहेका बेला रंगेहात नियन्त्रणमा लिएको हो।

अख्तियार स्रोतका अनुसार सिरहा सुपर मार्केट प्रालिको आर्थिक वर्ष २०७८/७९ को पूर्ण कर परीक्षण (फुल अडिट) गर्ने क्रममा कर अधिकृत पालले कर निर्धारण तथा अडिट प्रक्रिया सहज बनाइदिने भन्दै घुस मागेका थिए। आरोपअनुसार उनले आफूभन्दा माथिल्लो तहका अधिकारीलाई समेत मिलाउनुपर्ने भन्दै सुरुमै ५ लाख रुपैयाँ मागेका थिए।

अडिटका क्रममा कम्पनीलाई कर, जरिवाना तथा अन्य शीर्षकमा करिब २ करोड रुपैयाँ दायित्व पर्ने जानकारी दिइएको थियो। त्यसपछि थप कागजात परीक्षण हुँदा कर दायित्व अझ ३० देखि ३५ लाख रुपैयाँसम्म बढ्न सक्ने अवस्था रहेको बताइएको थियो।

यही क्रममा कर अधिकृत पालले सुरुमा १२ लाख रुपैयाँ दिए सबै विषय मिलाइदिने प्रस्ताव राखेको र कम्पनीले आर्थिक अवस्था कमजोर रहेको बताएपछि रकम घटाएर ५ लाख रुपैयाँमा सहमति गर्न खोजिएको आरोप छ।

घुस लेनदेनको योजनाअनुसार कम्पनीका प्रतिनिधिलाई सुरुमा विभिन्न समयमा प्रतिक्षा गराइएको थियो। पछि कर अधिकृत पालले फोनमार्फत सम्पर्क गरी भेट्ने स्थान र समय परिवर्तन गरेका थिए। अन्ततः रकम कार्यालयमै ल्याउन भनिएपछि अख्तियारले पूर्वतयारीसहित निगरानी बढाएको थियो।

बुधबार कार्यालयमै ५ लाख रुपैयाँ बुझाइरहेका बेला अख्तियारको टोलीले कर अधिकृत पाललाई रंगेहात पक्राउ गरेको हो। अख्तियार दुरुपयोग अनुसन्धान आयोग बर्दिबास कार्यालयका प्रमुख रामबहादुर कुरुम्बाङले पक्राउको पुष्टि गर्दै घटनाबारे थप अनुसन्धान भइरहेको जानकारी दिएका छन्।

अख्तियारले घटनासँग सम्बन्धित कागजात, प्रमाण र सम्भावित संलग्न व्यक्तिबारे अनुसन्धान जारी राखेको जनाएको छ।