काठमाडाैं। गएको राती अभियन्ता सोनाम वाङचुकले २६ दिन लामो अनसन तोडे।  उनले अनसन तोडेपछि भारतमा नीट प्रश्नपत्र चुहावट प्रकरणलाई लिएर जारी आन्दोलन नयाँ चरणमा प्रवेश गरेको छ। आन्दोलनको नेतृत्व गरिरहेको कक्रोच जनता पार्टी (सीजेपी) ले सरकारले आफ्ना प्रतिनिधिसँग तटस्थ स्थानमा वार्ता गर्न सहमति जनाएको जनाएको छ। पार्टीका अनुसार दुवै पक्षबीच शुक्रबार भारतको संविधान क्लबमा औपचारिक छलफल हुने तय भएको छ।

सीजेपीका नेता सौरभ दासले सरकारले आन्दोलनकारीको प्रस्ताव स्वीकार गरी वार्ताका लागि तटस्थ स्थान रोजेकोमा स्वागत गरेका छन्। उनका अनुसार संविधान क्लब अफ इन्डियामा हुने बैठकमा आन्दोलनका प्रमुख मागहरूमाथि विस्तृत छलफल हुनेछ। उनले शिक्षा मन्त्री धर्मेन्द्र प्रधानको राजीनामा, नीट प्रश्नपत्र चुहावट प्रकरणमा निष्पक्ष अनुसन्धान, दोषीमाथि कडा कारबाही तथा शिक्षा प्रणालीमा व्यापक सुधारको माग यथावत रहेको स्पष्ट पारे।

यसअघि कक्रोज जनता पार्टीका संस्थापक अभिजित दिपकेले सामाजिक सञ्जाल एक्समार्फत शिक्षामन्त्री धर्मेन्द्र प्रधानको राजीनामा नआएसम्म आन्दोलन नरोकिने जानकारी दिएका थिए। अर्कोतिर 

सीजेपीले लामो समयदेखि नयाँदिल्लीस्थित जन्तर-मन्तरमा धर्ना दिँदै आएको छ। आन्दोलनकारीहरूले प्रश्नपत्र चुहावटजस्ता घटनाले लाखौँ विद्यार्थीको भविष्य संकटमा परेको भन्दै शिक्षा प्रणालीमा आमूल परिवर्तन आवश्यक रहेको बताएका छन्। प्रधानमन्त्री नरेन्द्र मोदीले संसदमा प्रश्नपत्र चुहावटका घटनाविरुद्ध कडा कानुनी व्यवस्था गर्ने विधेयक ल्याउने घोषणा गरेपछि पनि सीजेपीले त्यसलाई मात्र पर्याप्त नभएको प्रतिक्रिया दिएको छ। पार्टीले परीक्षा अनियमितताप्रति सरकारको सबैभन्दा कडा कदम भनेको केन्द्रीय शिक्षा मन्त्री धर्मेन्द्र प्रधानलाई पदबाट हटाउनु हुने दाबी गरेको छ।

यता, चर्चित वातावरण अभियन्ता तथा शिक्षा सुधारका पक्षधर सोनम वाङ्चुकले सरकारबाट माग सम्बोधन गर्ने आश्वासन पाएपछि आफ्नो आमरण अनशन अन्त्य गरेका छन्। उनी शिक्षा सुधार र आन्दोलनकारी विद्यार्थीहरूको समर्थनमा लामो समयदेखि भोक हडतालमा थिए।

वाङ्चुकका अनुसार बिहीबार मध्यराततिर गुरुग्रामस्थित मेदान्ता अस्पतालमा केन्द्रीय मन्त्री जेपी नड्डा र जितेन्द्र सिंहले भेट गरी सरकार आन्दोलनकारीका मागबारे सकारात्मक रहेको र समाधानका लागि आवश्यक पहल गर्ने प्रतिबद्धता जनाएका थिए। त्यसपछि उनले अनशन तोड्ने निर्णय गरेका हुन्। यद्यपि आन्दोलनकारीहरूले आफ्ना मुख्य माग पूरा नभएसम्म शान्तिपूर्ण आन्दोलन जारी रहने बताएका छन्।