काठमाडौं। नेकपा एमालेका महासचिव शंकर पोखरेलले दङ्गा तथा भिड नियन्त्रणका क्रममा सुरक्षा निकाय बारम्बार असफल देखिनु गम्भीर विषय भएको भन्दै त्यसबारे व्यापक समीक्षा गर्नुपर्ने बताएका छन्।
राष्ट्रिय स्वतन्त्र पार्टी (रास्वपा) का सभापति रवि लामिछानेको पहलमा बसेको सर्वदलीय बैठकपछि सञ्चारकर्मीसँग कुरा गर्दै पोखरेलले सुनसरी घटनाले सुरक्षा संयन्त्रको क्षमता, मनोबल र स्रोत–साधनबारे गम्भीर प्रश्न उठाएको बताए।

उनले दङ्गा तथा भिड नियन्त्रणको विषय तत्कालीन परिस्थितिको मात्र नभई भविष्यको शान्ति र सुरक्षासँग जोडिएको मुद्दा भएको उल्लेख गर्दै सुरक्षा निकाय किन प्रभावकारी हुन नसकेको भन्ने विषयमा निष्पक्ष मूल्याङ्कन आवश्यक रहेको बताए।

‘दङ्गा र भिड नियन्त्रण गर्ने काममा अल्पकालिक र दीर्घकालिक दुवै पक्ष छन्। सुरक्षा निकायको मनोबल गिरेका कारण यस्तो अवस्था आएको हो कि, स्रोत–साधनको अभावले समस्या सिर्जना भएको हो भन्ने विषयमा गम्भीर समीक्षा हुनुपर्छ,’ उनले भने।

पोखरेलले सुनसरीजस्ता संवेदनशील घटनामा सर्वदलीय छलफल आवश्यक रहेको उल्लेख गर्दै रास्वपाले बैठक बोलाएको कदमलाई सकारात्मक बताए। तर, यस्तो पहल राजनीतिक दलभन्दा सरकारले नै लिनुपर्ने उनको धारणा थियो।

‘सर्वदलीय बैठक सरकार स्वयंले बोलाउनुपर्थ्यो। प्रधानमन्त्रीले नै यसको नेतृत्व लिनुपर्थ्यो। प्रधानमन्त्रीको तर्फबाट हुनुपर्ने पहल रास्वपाका सभापतिले गर्नुभयो,’ उनले भने।

उनले बैठकबाट मुलुकमा शान्ति, सुरक्षा, सामाजिक सद्भाव र सुशासन कायम राख्न सबै राजनीतिक दलको साझा प्रतिबद्धता व्यक्त गर्दै संयुक्त वक्तव्य जारी गरिएको पनि जानकारी दिए।