काठमाडाैं। रास्वपाको मनोनित हुन बाँकी महामन्त्री पदका लागि भूपदेव शाह र सुदीप ढकालबीच कडा टक्कर देखिएको छ। बालेन पक्षबाट हुने एक जना महामन्त्रीका लागि अहिलेसम्म कसैको नाम पनि सिफारिस गरिएको छैन। भनिन्छ– बालेन सुदीपलाई महामन्त्री बनाउन चाहन्छन्। तर, संस्थापन पक्ष यसका लागि तयार छैन।

कुनै समय बालेनका विश्वासपात्र मानिने भूपदेव शाह किन बालेनको रोजाइमा परेनन्? रास्वपा स्रोत भन्छ- बालेन शाहसँग असन्तुष्ट छन्। चितवन महाधिवेशनमा बालेन टिमले भूपदेवलाई उपसभापतिमा तोशिमा कार्की र महामन्त्रीमा गणेश कार्कीलाई सघाउन भनेको थियो।

तर, शाहले त्यसको ठीक विपरीत संस्थापन पक्षलाई सघाए। अझ विशेषगरी महामन्त्रीमा गणेश कार्कीको पक्षमा खुलेर लाग्न शाहलाई दबाब दिइएको थियो। शाहले भने खुलेरै महामन्त्रीमा विपिन आचार्यलाई सहयोग गरे।

यही कारण चितवन महाधिवेशनदेखि बालेन टिम, विशेषगरी कुमार बेन, शाहसँग आक्रोशित छन्। त्यसैले पनि बेन र असिम शाहको जोडबलमा बालेन टिमबाट सुदीपलाई महामन्त्रीमा अघि सार्ने तयारी भइरहेको बताइन्छ।

तर, त्यसका लागि संस्थापन तयार छैन। रास्वपा स्रोतको दाबी छ– सभापति रवि लामिछाने महामन्त्रीमा भूपदेव शाह नै हुनुपर्ने पक्षमा छन्। यही अर्को कारण हो- बालेन पक्षबाट पदाधिकारी मनोनयनमा ढिलाइ हुनुको।

अर्कोतिर, पदाधिकारी मनोनयनको प्रत्यक्ष असर सरकारमा पनि परिरहेको छ। पदाधिकारी मनोनयनकै विषयलाई लिएर प्रधानमन्त्री शाह र सभापति लामिछानेबीच तिक्तता बढ्दै गइरहेको राजनीतिक विश्लेषकहरू बताउँछन्। विकसित राजनीतिक घटनाक्रमहरूले पनि यो पुष्टि गर्छन्।

दुई साताअघि शाह र लामिछानेबीच बुढानीलकण्ठमा भेटवार्ता भएको थियो। उक्त भेटवार्तामा पनि पदाधिकारी चयनको कुरा उठेको रास्वपा वृत्त बताउँछ। भेटमा प्रधानमन्त्री शाहले पदाधिकारी मनोनयनको विषय छिटो टुंग्याउन भनेका थिए। उनले उक्त भेटमा ढकाललाई महामन्त्री बनाउने गरी प्रस्ताव गरेको बालेन निकट रास्वपा स्रोतको दाबी छ, जसमा सभापति लामिछाने हच्किएका थिए।

ढकाल रास्वपाको चितवन महाधिवेशनबाट केन्द्रीय सदस्यमा निर्वाचित भएका थिए। उनी अहिले प्रधानमन्त्री कार्यालयमा प्रधानमन्त्रीका प्रशासकीय सल्लाहकारका रूपमा काम गर्छन्। भनिन्छ– कुमार बेनलाई छाड्ने हो भने ‘देश बनाउने टोली’ (सुधन र सुनिल) पछि बालेनका विश्वासपात्र ढकाल नै हुन्।

बुढानीलकण्ठ बैठकमा शाहले एउटा अनौठो प्रस्ताव गरेका थिए। अर्थमन्त्री स्वर्णिम वाग्ले, कानुनमन्त्री सोबिता गौतम र महान्यायाधिवक्ता नारायणदत्त कँडेललाई हटाउने प्रस्ताव गरेका थिए। त्यसपछि लामिछाने ‘फायर’ भएको बताइन्छ। जवाफमा लामिछानेले शाहका प्रमुख सल्लाहकार कुमार बेन र प्रमुख राजनीतिक सल्लाहकार असिम शाहलाई पनि निकालिदिऔँ भनेर भनेको रास्वपा स्रोत बताउँछ।

पदाधिकारी मनोनयनमा कुमार बेन र असिम शाहको स्वार्थ बाझिँदा पनि ढिलाइ भइरहेको देखिन्छ। मुख्य विवाद नै उपसभापति र महामन्त्री पदमा केन्द्रित छ। यसअघि बालेन टिमबाट लम्साल उपसभापति र शाह महामन्त्री बन्ने चर्चा थियो।

तर, बालेन टिमको मनोनयन ढिलो भइरहँदा यता लम्साल र शाहलाई पदाधिकारीको दौडबाट बाहिर फाल्ने योजना बनिरहेको चर्चा पनि छ। र, रास्वपा वृत्तबाटै बताइएअनुसार लम्साल र शाहको बहिर्गमन योजनाको नेतृत्व कुमार बेनले गरिरहेका छन्।