काठमाडौं। देशको विभिन्न स्थानमा धार्मिक तनाव बढिरहेका बेला राष्ट्रिय प्रजातन्त्र पार्टी (राप्रपा)ले हिन्दु राष्ट्र स्थापनाबारे राष्ट्रिय बहस सुरु गर्न आह्वान गरेको छ। तराई-मधेसमा भइरहेका हिंसात्मक घटनाले हिन्दु राष्ट्र नेपालको आवश्यकता पुनः पुष्टि गरेको दाबी पनि राप्रपाले गरेको छ।

अध्यक्ष राजेन्द्रप्रसाद लिङ्देनको अध्यक्षतामा बसेको केन्द्रीय कार्यसम्पादन समितिको बैठकपछि प्रवक्ता मोहनकुमार श्रेष्ठले विज्ञप्ति जारी गर्दै हिन्दु राष्ट्रको एजेन्डा कुनै धर्म, सम्प्रदाय वा समुदायको अधिकार सीमित गर्ने उद्देश्यबाट प्रेरित नभएको बताएका छन्।

राप्रपाले हिन्दु राष्ट्रको अवधारणा नेपालको ऐतिहासिक पहिचान, राष्ट्रिय एकता, सांस्कृतिक निरन्तरता तथा सबै नागरिकको धार्मिक स्वतन्त्रता, समान अधिकार र पारस्परिक सम्मानलाई संस्थागत गर्ने राष्ट्रिय अवधारणा भएको दाबी गरेको छ। पछिल्ला दुई दशकको अभ्यासले हिन्दु राष्ट्र नेपालको आवश्यकता पुष्टि गरेको उल्लेख गर्दै यस विषयमा खुला बहस सुरु गर्न सबैसँग आग्रह गरेको छ।

पार्टीले तराई-मधेसका विभिन्न क्षेत्रमा हिन्दु चाडपर्व र धार्मिक महोत्सवका बेला पटक-पटक साम्प्रदायिक तनाव दोहोरिएकोप्रति गम्भीर ध्यानाकर्षण भएको जनाएको छ। पछिल्ला हिंसात्मक घटनाप्रति दुःख व्यक्त गर्दै सरकारले थप जिम्मेवारीका साथ काम गर्नुपर्ने पनि राप्रपाको भनाइ छ।

प्रहरीको गोलीबाट नागरिकको मृत्यु हुनु भीड व्यवस्थापनमा भएको गम्भीर प्रशासनिक कमजोरीको परिणाम भएको राप्रपाको ठहर छ। राज्यले संयमता गुमाउँदा र परिस्थितिको सही विश्लेषण गर्न नसक्दा तराई–मधेसमा तनाव बढेको दाबी पनि विज्ञप्तिमा गरिएको छ।